DILI, 09 abríl 2024 (TATOLI)—Governu liuhusi reuniaun Konsellu Ministru (KM) estraordináriu, tersa ne’e, aprova projetu rezolusaun Governu, ne’ebé aprezenta mós husi Vise-Primeiru-Ministru, Asuntu Ekonómiku, Francisco Kalbuadi Lay.
Diploma ne’e hodi revoga rezolusaun Governu númeru 6/2016, loron 17 fevereiru, ne’ebé altera husi rezolusaun númeru 24/2023, loron 24 maiu, ne’ebé kria Komisaun Nasionál ba Fasilitasaun Komérsiu (CONFAC, sigla portugés).
Notísia relevante : Governu aprova proposta ratifikasaun protokolu adezaun ba OMK
Vise-Ministru Asuntu Parlamentár, Adérito Hugo da Costa, hateten, desizaun ida-ne’e determina katak funsaun ne’ebé molok ne’e dezempeña husi CONFAC sei absorve husi Unidade Estratéjika ba Integrasaun Ekonómika ne’ebé foin estabelese lalais ne’e.
“Objetivu prinsipál mak atu garante koordenasaun ne’ebé efikásia liu kona-ba inisiativa sira fasilitasaun komérsiu nian, inklui reforma lejizlativa, promove diálogu entre parte sira no apoiu ba integrasaun ekonómika país nian,” Adérito Hugo da Costa, relata hafoin reuniaun ezekutivu, iha Palásiu Governu.
Nune’e, reorganizasaun iha Gabinete ida-ne’e sai imperativa hafoin Timor-Leste nia adezaun ba Organizasaun Mundiál Komérsiu (OMK) atubele intensifika esforsu koordenasaun no integrasaun ekonomia tuir ezijénsia atuál.
Jornalista : Antónia Gusmão
Editora : Julia Chatarina
