DILI, 08 Maiu 2025 (TATOLI) –Autoridade munisípiu Dili (AMD) ezekuta ona Orsamentu jerál Estadu (OJE) 2025 ho atinjimentu hamutuk 24,79% iha trimestrál primeiru to’o agora (Janeiru to’o Abríl).
“Ezekusaun orsamentu tinan-2025 nian to’o iha fulan-Abríl, munisípiu Dili atinje ona totál ezekusoens ba kategorizasaun lima hanesan daudaun ne’e atinji ona 24,79%, no ninia atuál obligasaun ho pursentu 33,61 no atuál obligasaun komprimisu ho pursentu 42,3”, Prezidente interinu Autoridade munisípiu Dili (AMD) hanesan mós Diretór Jerál Desentralizasaun no Governu Lokál, António Agostu Guterres, informa ba jornalista TATOLI iha AMD, Dili, ohin.
Kategória orsamentu ne’ebé AMD halo ezekusaun mak hanesan:
- Saláriu no vensimentu ho pursentu 22,22;
- Beins servisu no korrentes ho pursentu 52,27;
- Transferénsia públikas ho pursentu 43,22;
- Kapitál menór ho pursentu 95,25;
- Kapitál dezenvolvimentu ho pursentu 100,00;
Kona-ba ezekusaun husi programa tinan 2025 ne’e, tuir autoridade ne’e katak la’o duni tanba saláriu vensimentu absolutamente mak selu funsionáriu; mákina Estadu ne’ebé iha autoridade munsipál Dili to’o servisu munisipál 19 no postu administrativu lima.
“Enkuantu beins servisu konkorrentes mós finansia ba servisu balun hodi fornesimentu sasan ekipamentus, kombustivél, transferénsia públika nia atenjimentu ba iha merenda eskolár no mós ba PNDS no subsídiu ba lideransa komunitária”, PAM interinu ne’e esplika.
Nia hatutan, iha kapitál menór ne’ebé ho pursentu 95,25 ne’e, AMD halo akizisaun ba ekipamentu hodi haforsa servisu saneamentu nian no planu sei sosa tan kamioneta balun hodi uza ba operasionál no mós tratór balun.
Kapitál dezenvolvimentu hotu-hotu agora la’o hela ho komitmentu no estabelese obligasaun hotu ona. Signifika, bainhira para kualifikasaun ramata ba iha aprovizionamentu ne’e katak kontratu ema ezekuta hotu ona.
“Loloos iha loron 30 Abríl ne’e ramata ona subvensaun ona kontratu maibé tanba ema hotu-hotu iha hela situasaun lutu nasionál ba santidade Papa Francisco, entaun ida demora uituan”, nia dehan.
Prezidente autoridade munisípiu Dili internu ne’e informa katak agora daudaun mós AMD halo elaborasaun ba formulasaun Planu asaun anuál (PAA) 2026 nian no identifika iha programa 15, sub-programa 46 no atividade hamutuk 90-resin. Totál orsamentu ba programa hirak-ne’e hamutuk US$ 26,871,791,92.
PAA ne’e sei lori ba Komite revizaun orsamentu (CRO, sigla portugés) tanba ne’e antes ne’e liuhusi sorumutu koordenasaun dezenvolvimentu nasionál iha City-8 Manleuana, ne’ebé lidera hosi Ministériu Administrasaun Estatál (MAE), bainhira servisu munisipál hotu-hotu ba aprezenta idaidak ninia programa.
Notísia relevante:Reuniaun inter-ministeriál aborda temátiku oioin ba dezenvolvimentu
Nune’e mós halo ajustamentu tan ba kestaun balun ne’ebé ligadu ba suku, no administrativu, entaun iha tinan-2026 nian ita sei fahe ba saláriu vensimentu hamutuk $8,852,993,00 ba bens servisu korrentes totál $5,293,419,00, transferénsia públikas hamutuk $9,272,016,19, kapitál menór $567,040,00 no kapitál dezenvolvimentu hamutuk $2,886,323,73.
“Agora daudaun ita tuur hamutuk atu oinsá mak halo ajustamentu, hafoin hato’o ba MAE hodi halo aliñamentu programasaun estrutura tuir munisípiu ida-idak nian, no bainhira tempu to’o loke CRO mak ita foin aprezenta”, nia hateten.
Jornalista: Alexandra da Costa
Editór: Rafael Ximenes de A. Belo
