DILI, 17 abríl 2023 (TATOLI) – Ekipa futeból selesaun nasionál U-23 segunda ne’e aranka ona ba Thailandia ho aviaun Citilink iha oras tuku 13:20 hodi ba hala’o ‘’training Camp’’ hodi prepara ba SEA Games Kamboja ne’ebé sei akontese iha maiu.
Jerente ekipa Lourenço Guterres informa jogadór hirak ne’e hamutuk 20 no ofisiál hamutuk na’in-neen, enkuantu total ba ekipa ne’e hamutuk 26 mak aranka ba Thailandia.
“Tuku 13:20, ami semo sai ona hosi Dili ba liuhosi Bali depois aranka kedan ba Thailandia, viajen ida ne’e hodi ba hala’o preparasaun atleta sira nian antes ba SEA Games iha fulan maiu ne’e”, Jerente ekipa dehan ba Agência TATOLI iha aeroportu Prezidente Nicolau Lobato Dili, ohin.
Nia dehan, tikete no treinamentu iha Thailandia hetan responsabilidade hosi Federasaun Futeból Timor-Leste (FFTL).
Tuir nia, durante iha Thailandia jogadór sira sei halo treinamentu no jogu amigavél hasoru klube sira iha Thailandia hodi koko forsa jogadór sira nian antes ba kompete iha SEA Games.
Jogadór sira hela iha Thailandia durante loron 11 no 27 abríl, ekipa selesaun nasionál sei aranka fali ba Kamboja hodi hela iha ne’ebá to’o loron kompetisaun.
Iha fatin hanesan, jogadór U-23 João Bosco Halle sente kontente bele reprejenta Timor-Leste hodi ba halo preparasaun iha Thailandia no promote sei servisu makas hodi hatudu jogu ne’ebé di’ak.
“Ha’u sente kontente no orgullu bele reprejenta tan nasaun doben ne’e nia-naran hodi ba kompete iha SEA Games fulan oin mai ne’e, ami ekipa sei servisu makas durante treinamentu atu bele fó rezultadu di’ak ba nasaun”, Halle revela.
Jogu SEA Games loloos ne’e Governu mak finansia hotu maibé tanba difikuldade iha orsamentu, entaun FFTL rasik mak finansia ba akomodasaun hotu durante training camp iha rai liur, hahú hosi osan viajen jogadór nian, selu hotel no han hemu iha Thailandia no ba to’o Kamboja.
Totál orsamentu ne’ebé FFTL sei gasta ba jogadór no ofisiál sira durante SEA Games hamutuk rihun $200.
Kaléndariu ba jogu SEA Games futeból Timor-Leste ne’ebé tama iha grupu A ne’ebé sei kompete ho nasaun sira hanesan uma-na’in Kamboja, Indonézia no Filipina. Enkuantu grupu B mak hanesan Vietname, Thailandia, Malazia, Singapura no Laos.
Notísia relevante : Semana oin selesaun nasionál U-23 arranka ba ‘’training camp’’ iha Thailandia
Jornalista: Hortencio Sanchez
Editór : Zezito Silva
