DILI, 14 abríl 2023 (TATOLI) – Adjuntu Sekretáriu Jerál Federasaun Futeból Timor-Leste (FFTL) Frederico Martins, informa segunda semana oin jogadór selesaun nasionál U-23 sei arranka ba Thailandia hodi tuir traning camp hafoin ba kompete iha SEA Games Kamboja fulan maiu mai ne’e.
“Jogadór ba SEA Games ne’e ita prepara kedan iha fulan fevereiru nia-laran to’o ohin loron, buat hotu los ona jogadór hamutuk na’in 20 tuir kritéria SEA Games nian, segunda agora sira sei ba halo preparasaun iha Thailandia depois remata, loron to’o sira ba direta ba Kamboja ona”, Frederico dehan ba Agência TATOLI, ohin.
Nia dehan, iha Thailandia jogadór sira sei halo jogu try out ho klube Thailandia nian atu koko forsa jogadór sira nian to’o ona iha ne’ebé no frakeza iha ne’ebé atu bele hadia.
Jogu SEA Games loloos Governu mak finansia hotu maibé tanba difikuldade iha orsamentu FFTL rasik mak finansia ba akomodasaun hotu durante traning camp iha rai liur, hahú hosi osan viajen jogadór nian, selu otél no han hemu iha Thailandia no ba to’o Kamboja.
Totál orsamentu ne’ebé FFTL sei gasta ba jogadór no ofisiál sira durante SEA Games hamutuk rihun $200.
Jornalista: Hortencio Sanchez
Editór : Zezito Silva
