BOBONARO, 16 jullu 2024 (TATOLI) – Sentru Saúde Komunitária (SSK) postu administrativu Atabae, munisípiu Bobonaro, hahú fulan-janeiru to’o agora rejista kazu Tuberkuloza 10 no HIV/AIDS mós hamutuk 10.
Xefe Sentru Saúde Atabae, Filomeno Pires, informa, kazu TB ne’e deteta liuhosi teste laboratóriu hafoin hasai pasiente nia kaben-tasak.
Notísia relevante: Janeiru-dezembru, KBP rejistu kazu Tb 494 no na’in 11 lakon vida
“Durante ne’e ita deteta Tuberkuloze 10 no HIV/AIDS 10, komesa janeiru mai to’o agora, depois ita halo detesaun kazu ne’e, ita halo tratamentu Direct Off Treatment (DOT) ne’ebé observa direita husi ita-nia pesoál saúde, ne’ebé durante ne’e kazu sira-ne’e ita halo jestaun di’ak, sira hemu ai-moruk loro-loron, ita laiha ema ida mate,” nia informa ba jornalista sira iha kna’ar-fatin, segunda ne’e.
Jerente sentru Saúde Atabae ne’e relata, kona-ba kazu HIV/AIDS fulan kotuk deteta tán ema na’in-rua no husi totál kazu 10 nee balu halo tratamentu di’ak iha Ospitál Referál Maliana no balu lakohi halo tratamentu.
“Ida-ne’e ita nafatin buka tuir atu ita halo konseling ba sira nune’e motiva sira bele kontinua halo tratamentu, tanba risku boot liu kuandu sira la halo tratamentu, ne’e komplikasaun fasil atu akontese ba sira,” nia tenik.
Hahú husi fulan-janeiru to’o fulan-maiu tinan 2024, Sentru Saúde Atabae mós rejista kazu Infeksaun Respiratóriu Aguda (IRA) hamutuk 1,877, diarreia 266, asidente tráfegu 114, isin-katar 41, pneumonia 20, pedabakteriana 12, dengue haat no kazu asu tata ema ida.
“Iha kazu sira ohin ha’u temi ne’e, ita laiha ema mate, maibé iha kazu asidente tráfegu mak mate ida iha sentru saúde Atabae no moras seluk ita refere ba Maliana mak mate,” nia hateten.
Sentru Saúde ne’e mós rejista inan-isin rua 150 mak partu iha sentru saúde no postu saúde haat, no husi númeru ne’e na’in-10 mak partu iha uma hetan akompañamentu husi pesoál saúde.
Durante ne’e mós SSK Atabae la rejista kazu mortalidade inan-isin rua no bebé durante prosesu partu iha fasilidade saúde.
Enkuantu Sentru Saúde Atabae, iha postu saúde haat hanesan postu saúde Damalaran, Nunudoi, Rairobo no Aidabasalala.
Notísia relevante: Saúde Bobonaro lakon kontaktu ho pasiente HIV/AIDS na’in-20
Jornalista: Sérgio da Cruz
Editór: Evaristo Soares Martins
