DILI, 16 Jullu 2025 (TATOLI) – Jardín nu’udar fatin ba ema atu halo reflesaun no jardin halo mós sidade kapitál sai furak, tanba kompozisaun paizajístika ho ai-horis oioin, inklui materiál no fasilidade ne’ebé iha.
Tanba ne’e, sidadaun hotu iha responsabilidade atu kuida, labele estraga fasilidade ne’ebé Governu harii ona, liuliu jardín sira iha kapitál Dili.
Deputada CNRT, Cedelízia Faria dos Santos, lamenta ho atetude husi sidadaun balun foin lalais estraga fasilidade iha jardín Aimutin ne’ebé konstrui seidauk kleur hetan ona estragu.
“Husu Ministériu Administrasaun Estatál (MAE), atu orienta Xefe Suku no Xefe Aldeia sira, hodi tau matan ba jardín sira ne’ebé konstrui ona uza orsamentu Estadu,” nia hato’o liuhusi reuniaun plenária Parlamentu komisaun permanente, ohin.
Nune’e mós Deputadu FRETILIN, David Dias Ximenes ‘Mandati’, fó hanoin ba entidade kompetente atu halo jestaun di’ak ba jardín sira ne’ebé konstrui ona iha kapitál nasaun. Tanba durante ne’e ladún iha manutensaun di’ak.
Vise Ministru ba Asuntu Parlamentár, Adérito Hugo da Costa, rejista preokupasaun referida sei hato’o ba entidade tutela hodi tau atensaun liután.
Jornalista: Nelson de Sousa
Editór: Evaristo Soares Martins
