DILI, 19 Marsu 2026 (TATOLI)—Governu Suisa hametin kooperasaun Bilaterál ho Timor-Leste hodi fó kontribuisaun ba konstrusaun nasaun liuhusi área oioin hanesan edukasaun, empoderamentu feto, ekonomia, jestaun risku dezastre naturál no investimentu setór privadu.
Deklarasaun ne’e relata husi Embaixadór Suisa ba Timor-Leste, Oliver Zehnder, hafoin hala’o enkontru despedida hamutuk ho Primeiru-Ministru, Kay Rala Xanana Gusmão, iha Palásiu Governu, ohin.
Embaixadór Suisa ba Timor-Leste, Oliver Zehnder, hateten hasoru mali ho Primeiru-Ministru, Kay Rala Xanana Gusmão ne’e, ho objetivu atu despede ikus ho Xefe Governu tanba nia sei husik rejiaun ida-ne’e iha tempu besik nia laran.
“Ha’u mós hakarak kongratula ba Timor-Leste tanba sai ona membru ASEAN, no ami afirma katak Suisa, ne’ebé sai hanesan parseiru diálogu setoriál sei apoiu Timor-Leste iha membru ASEAN,” Embaixadór ne’e afirma ba jornalista sira iha Palásiu Governu, ohin.
Aleinde ne’e orgaun diplomata ne’e dehan sira mós sei dezenvolve programa balun no nia hakarak rona dezafiu ne’ebé nasaun ne’e enfrenta liuliu liga ba empregu, diversifikasaun ekonomia, nune’e sira sei koopera ho Timor-Leste hodi fó kontribuisaun ba dezenvolvimentu nasaun no nia povu.
“Tamba ne’e, ami sei lori ami-nia setór privadu ne’ebé kompetitivu hodi investe iha ne’e. Ami koñese mós kona-ba konstrusaun nasaun, dezafiu konstrusaun nasaun, no ha’u sublina didi’ak oinsá Suisa hanesan impressiona ho progresu ne’ebé imi-nia nasaun hetan iha tinan 20 liubá,” nia hateten.
Enkuantu, nia haktuir, durante ne’e Suisa servisu hamutuk ho Timor-Leste iha área oioin hanesan jestaun ba risku dezastre naturál, edukasaun, direitu ba feto no investimentu setór privadu Suisa nian iha Portu Tibar Bay, no sira planeia atu lori tan setór privadu balun mai investe iha Timor liuliu iha área petrolíferu.
Jornalista : Alexandra da Costa
Editór : Cancio Ximenes
