DILI, 12 dezembru 2024 (TATOLI) – Prokuradór Jerál Repúblika(PGR), Alfonso Lopez, dehan Supremu Tribunál Justisa (STJ) deside obsolve kazu rezultadu aditoria projetu Zona Espesiál Ekonomia Merkadu Sosiál (ZEEMS) ne’ebé envolve husi demandu MA no demandadu 11 seluk ne’ebé mak uluk sai jestór ba projetu ZEEMS.
Nia dehan, Supremu Tribunál Justisa absolve kazu ne’e tanba iha prosesu rejulgamentu ba auditoria projetu ZEEMS ne’e laiha indísiu no fatu ruma ne’ebé hatudu katak demandu sira-nia hahalok, lahamosu prejuizu ba Estadu.
“Maibé husi Ministériu Públiku ne’ebé hatama prosesu ne’e sei haree no análize hafoin ida-ne’e mak sei halo rekursu kontra desizaun Supremu Tribunál Justisa”, Alfonso Lopez hateten iha Timor Plaza ba jornalista sira hafoin partisipa semináriu ho tema fortalese kooperasaun instituisional atu supera konstranjimentu administrativa no prosesuál, relasiona ho prosedimentu kriminál entre PNTL ho Ministériu Públiku hodi konsolida di’ak liután estabilidade nasionál.
Nia dehan, sei iha tempu ba Ministériu Públiku atu halo rekursu tuir lei.
“Tanba prosesu ida sempre tuir nian tramitasaun legál. Tribunál nia desizaun ne’e ita respeita maibé tuir prinsípiu legalidade ne’e iha mós prinsípiu kontraditóriu kuandu ida mak konkorda sei halo rekursu hodi kontesta ba desizaun. Maibé hanesan ha’u dehan Ministériu Públiku sei haree no análize hafoin ida-ne’e mak hatama rekursu”,
Jornalista: Natalino Costa
Editór : Zezito Silva
