DILI, 10 Setembru 2025 (TATOLI)–Embaixadór Malázia iha Timor-Leste, Dato Amarjit Sarjit Singh, hateten Timor-Leste to’o ona iha ASEAN maibé sei iha dalan naruk atu la’o.
Notísia Relevante: KM aprova rezolusaun 14 apoia Timor-Leste nia adezaun ba mempru plena ASEAN
“Ha’u dehan, ita-boot sira to’o ona iha ASEAN maibé sei iha dalan ne’ebé naruk tebes atu la’o,” Embaixadór ne’e hateten ba Agência Tatoli liuluhsi programa “Dalan ba ASEAN” ne’ebé hala’o iha Palásiu Prezidensiál Nicolau Lobato, Baurru Pite, kuarta ne’e.
Nia hateten, atu Timor-Leste adere ba membru plenu ASEAN ne’e Timor-Leste tenke hakuak ASEAN ho laran tomak.
“Ami-nia mensajen ba ita-nia maluk sira iha Timor-Leste mak atu hakuak ASEAN ho laran tomak no hahú buka dalan no meiu hotu atu aproveita adezaun ba ASEAN hodi hatán ba kestaun balun iha Timor-Leste,” nia dehan.
Nia hatutan, kestaun balun ne’ebé Timor-Leste presiza iha mak produtividade no implementasaun ba programa hotu ne’ebé fó benefisiu ba povu no nasaun.
“Buat barak iha ASEAN hetan difikuldade iha sira-nia velosidade bainhira to’o iha faze implementasaun. Ha’u hanoin, ASEAN tuir nia natureza, se ita-boot sira sei hakuak duni ASEAN komprende katak tau énfaze boot ba implementasaun desizaun sira, implementasaun ne’ebé sustentavel,” Embaxadór ne’e dehan.
Antes ne’e, iha loron 29 fulan-Maiu liu-ba, Governu liuhusi reuniaun Konsellu Ministru, aprova projetu Rezolusaun Governu, ne’ebé aprezenta husi Vise-Ministra ba Asuntus ASEAN, Milena Maria da Costa Rangel, ne’ebé estabelese kriasaun grupu traballu interministeriál ida-ne’ebé responsavel ba implementasaun rekomendasaun ne’ebé hatuur iha Deklarasaun Prezidénsia ASEAN nian, ne’ebé emite iha Simeira ASEAN ba da-46, ho objetivu atu konklui prosedimentu formál sira ne’ebé nesesáriu, nune’e mós aselera negosiasaun sira kona-ba akordu ekonómiku prinsipál sira ne’ebé nesesáriu ba prosesu adezaun plena Timor-Leste nian ba organizasaun ne’e, ne’ebé tuir planu sei hala’o iha fulan-outubru 2025.
ASEAN aseita TL sai membru plenu
Durante Simeira ASEAN bá dala-46 iha Kuala Lumpur-Malázia líder hotu-hotu fó apoiu tomak ba Timor-Leste atu bele adere bá ASEAN ne’ebé nu’udár forum importante, hodi ko’alia kona-bá situasaun hotu-hotu ne’ebé akontese iha mundu.
Maibé Timor-Leste nia adezaun ba membru plenu ASEAN sei ofisializa iha simeira ASEAN ba dala-47 ne’ebé sei realiza iha fulan-Outubru mai ne’e iha Malázia.
Jornalista : Hortencio Sanchez
Editór : Cancio Ximenes
