DILI, 06 Maiu 2026 (TATOLI) – Ajénsia Promosaun Investimentu no Exportasaun (TradeInvest) kontinua halo promosaun investimentu nian ba empreza boot sira iha Singapura.
Promosaun investimentu sira ne’e hala’o husi ekipa TradeInvest Timor-Leste hala’o vizita ofisiál ba Singapura iha loron 05 Maiu 2026, ho objetivu reforsa relasaun investimentu no buka oportunidade foun ba dezenvolvimentu ekonómiku iha Timor-Leste, hafoin Timor-Leste tama ona ba membru ASEAN.
Nota imprensa ne’ebé Tatoli asesa, delegasaun ne’e lideradu hosi Diretór Ezekutivu, Duilio Marino Gusmão Araújo da Silva, akompaña hosi Adjuntu Diretór Ezekutivu Roberto Lai no Asistente Ezekutivu João Carrascalão.
Durante vizita, TradeInvest Timor-Leste hala’o enkontru ho Mooreast Holdings Ltd, ne’ebé simu hosi nia Ezekutivu Diretór, Sim Koon Lam, hamutuk ho Chairman of the Board no Independent Diretór, Joseph Ong no ekipa tékniku sira.
Ihha reuniaun ne’e, Mooreast aprezenta planu investimentu iha setór enerjia renovável iha Timor-Leste, liuliu produsaun eletrisidade hosi anin (wind energy).
Enkuantu TradeInvest rasik simu pozitivamente proposta ne’e no espresa prontidaun atu fasilita no apoiu implementasaun ba investimentu refere, tanba konsidera inisiativa ida-ne’e bele sai hanesan investimentu dahuluk iha área enerjia anin iha Timor-Leste, no iha poténsia atu sai katalizadór importante ba dezenvolvimentu enerjia renovável iha país.
Durante vizita, delegasaun TradeInvest mós realiza enkontru ho Enterprise Singapore (ESG), ne’ebé lideradu hosi Diretór ba Rejiaun Sudeste Aziátiku, Lim Jing Jun.
Sorumutu referida, parte TradeInvest esplika kona-bá papél instituisaun nian nu’udar ajénsia promosaun investimentu no manifesta interese atu hametin kolaborasaun estratéjika ho ESG, atu fó apoiu ba atrasaun investimentu no promosaun komérsiu entre nasaun rua ne’e.
Enterprise Singapore mak ajénsia Governu ne’ebé fó apoiu ba empreza sira atu expande negósiu iha merkadu internasionál. Enkuantu Mooreast Holdings Ltd sai hanesan empreza inísiu balun ne’ebé mak hetan apoiu hosi ESG hodi halo espansaun rejionál, inklui iha Timor-Leste.
Sorumutu ne’e, TradeInvest Timor-Leste no ESG konfirma sira-nia kompromisu atu hadi’a no aprofunda kolaborasaun iha tempu badak, ho objetivu fasilita interasaun investimentu no komérsiu ne’ebé bele fó benefísiu ba ekonómia ba nasaun rua.
Jornalista: Arminda Fonseca
Editór: Evaristo Soares Martins
