DILI, 27 Abríl 2026 (TATOLI)—Tribunál Judisiál Primeira Instánsia Baukau (TJIPB) hasai despaisu hodi fa’an ikan tonelada sia, nu’udar objetu apreendidu ne’ebé Unidade Polísia Marrítima (UPM) halo apreensaun husi peskadór ilegál indonéziu na’in-32, iha área Tasi Mane zona Com – Lautein, iha Sesta (18/04).
Tribunál Baukau hasai despaisu hodi halo venda preventiva ba objetivu sira tanba bazeia ba Komandu Munisípiu Lautein liuhusi Ministériu Públiku Baukau nia pedidu atu prevene objetu labele hetan estragu. Nune’e, Tribunál Baukau aseita.
“Venda preventiva ne’e ho intensaun oinsá mak atubele fa’an sasán sira ne’e (ikan), ho intensaun atu prevene liu ba estragus,” Komandante UPM, Superintendente Xefe Polísia Eugénio Pereira, hateten ba Jornalista sira iha Komandu Jerál Polísia Nasionál Timor-Leste (PNTL), Kaikoli, Segunda ne’e.
Nia haktuir, ekipa konjuta momentu ne’ebá halo apreensaun ba ró ne’e iha Com, identifika katak tripulante sira la loke jerádór hodi rai ikan, nune’e objetu sira atu estraga, ho situasaun ne’e iis daudaun ona, entaun bele ameasa ba objetu ne’e rasik.
“Tanba ne’e, Komandu Unidade Polísia Marrítima liuhusi Postu Com hamutuk ho Komandu Munisípiu Lautein aprezenta ba Ministeriu Públiku, ho situasaun sira ne’e halo promosaun ba Tribunál para husik Tribunál halo despaisu, nune’e infelizmente Tribunál halo duni nia despaisu ba vende preventiva objetu ne’e para prevene husi estragus,” nia dehan.
Notísia relevante : Komandu Munisípiu Lautein aprezenta tripulante 32 halo peska ilegál ba MP Baukau
Komandante informa, Komandu Munisípiu Lautem hamutuk ho UPM Postu Com fa’an ona ba komunidade Lautein no osan sira husi venda preventiva sei enkamiña ba sofre Estadu.
Aleinde ne’e, ró ne’ebé tripulante sira uza hodi halo peska ilegál agora UPM lori ona hodi atraka iha Kuartel Polísia Marrítima Seonál.
Nia dehan, evidénsia sira iha ró ne’e mak rede peska no laiha tan buat seluk.
Komandante Eugénio Pereira konta tuir, momentu UPM ho nia parseiru serbisu sira halo apreensaun ba ró ne’e tanba sira halo atividade peska ilegál iha Tasi Kosta Súl iha área Com nian, ne’ebé tuda hela rede peska iha área referida, nune’e Autoridade Seguransa ba halo apreensaun.
Jornalista : Natalino Costa
Editora : Julia Chatarina
