DILI, 07 Juñu 2026 (TATOLI) – AC Mamura nia erru defensivu, inklui autogolu tolu, fó dalan ba Hiber Dili FC manán ho rezultadu 4-1 iha Estádiu Munisipál Dili no asegura sira-nia promosaun ba Primeira Divizaun Liga Futeból Timor-Leste (LFTL) époka 2026.
Iha Estádiu Dili, atmosfera domina husi adeptu Hibers nian ne’ebé hakilar, dansa, selebra to’o ápitu finál. Vitória ne’e marka momentu istóriku ba klube ne’ebé hetan promosaun, depoizde sa’e husi Terseira Divizaun iha 2025.
Ironia boot iha jogu ne’e mak Mamura la monu tanba adversáriu, maibé tanba ‘trio’ nia ain erru rasik. Autogolu tolu husi Cristiano Loiola (21), Elpidio Marques (9), no Melchior Cristovão (32) mak determina rezultadu finál.
Jogu ne’e parte husi LFTL Segunda Divizaun grupu B, ne’ebé sai desizivu iha Estádiu Munisipál Dili, tanba Hibers tama iha jogu ho pontu 7, enkuantu Mamura ho 4.
Jogu foin hahú, la liu minutu 3, Hibers hetan vantajen. Bola kruza simples husi direta, defeza Mamura Cristiano Loiola (21) pániku no dezvia bola tama iha nia rede rasik. Fó 1-0 ba Hibers, adeptu sira hakilar.
Mamura responde iha minutu 21, avansadu Nuno Valente (13) aproveita bola barullu iha área Hibers nian no suta maka’as ba rede, bola tama, rezultadu 1-1.
Maibé iha minutu 40, Arbert Tefa (9) finaliza kontra-atake ho kalma no fó Hibers fila ba lidera pontu 2-1 iha jogu primeira parte.
Hahú segunda parte, Mamura sofre tan golu iha minutu 47, Elpidio Marques (9) tenta hasai bolu ho ulun, maibé dezvia ba nia rede rasik, Elpidio tuur, liman taka oin no pontu sai 3-1.
Iha minutu 68, erru mai tan husi Melchior Cristovão (32), tanba ansi atu antesipa, maibé nia la kontrola ho di’ak no lansa sutu halo bola muda diresaun tama rede, dudu tan rezultadu ba 4-1. Ho hat-trick autogolu. Hibers festa vitória ho adeptu sira huu korneta, hamriik dansa hakilar Hibers…Hibers…Hibers…
Adeptu atus ba atus halo rame duni Estádiu ho sira-nia maneira rasik. Maibé, Mamura tuur tane hasan hodi haree ho laran-triste no fila bá uma ho hakmatek no Hibers fila uma halo festa no halo barullu ho motór nia lian iha estrada diresaun Estádiu bá Taibessi.
Jogu ne’e la’ós baibain, tanba ne’e finál hodi hetan billete atu hakat bá Primeira Divizaun.
Durante jogu, mosu tensaun husi duelu ne’e, ne’ebé rezulta kartaun kinur haat: Mamura: João Gusmão (3) 18’, Nuno Valente (13) 66’ tanba halo erru iha kampu laran durante jogu.
Hibers: Edencio da Costa (13) 54’, Gaudéncio Lopes (16) 88’ tanba han tempu, trava kontra-atake.
Iha kompetisaun ne’e, árbitru Francisco Pereira, ho liña Filomeno da Silva, Agapito Carvalho, no rezerva Agustinho Mota, kontrola jogu ho di’ak maski iha presaun maka’as.
Biar nune’e, apitu ikus marka festa boot iha estádiu Dili. Adeptu Hibers invade atmosfera selebrasaun ho kór mutin-kinur, enkuantu jogadór sira halai bá adeptu, balun tanis kontente. Mamura, iha parte seluk, sai triste no fila ho silénsiu.
Hibers Dili FC agora rejista istória ida importante iha futeból Timor-Leste. Hafoin promove husi Terseira Divizaun iha tinan kotuk 2025 , klube ne’e la presiza tempu naruk atu adapta an iha Segunda Divizaun. Iha de’it tinan ida nia laran, Hibers Dili FC hatudu dezempeñu ne’ebé impresivu no konsege asegura promosaun ba Primeira Divizaun 2026, marka hakat boot ida ba klube nia dezenvolvimentu.
Ekipa Hibers Dili FC
Ricardo Soares (20), José Silva (24), Afonso de Carvalho (23), Ananias Rae (15), Anggiso Barbosa (12), Jepri Mare (26), Cristovão de Carvalho (25), Gabriel Ati (8), Inocêncio Ati (18), Denilson Soares (10), Albert Tefa (9).
Jogadór suplente
Ricardo Soares (1), Pascoal Amaral (11), Joanico Farão (4), Husen Klau (2), Inácio Ulu (14), Hernani da Silva (17), Nelvio Almeida (7), Derson Ulu (6), Juvends Nunes (22), Donanciano Ulun (21), Edencio da Costa (13), Gaudêncio Lopes (16).
AC Mamura
Boavento Moniz (1), Roberto Maia (28), João Gusmão (3), Nuno Valente (13), Elpidio Marques (2), Cristiano Loiola (21), Helder Valente (7), Pascoal Bucar (25), Melchior Cristovão (32), Zeferino do Carmo (23), Volter Clau (20).
Jogadór suplente
Abílio Berek (30), Eduardo Rêgo (5), Jeovanio Freitas (14), Marquito de Almeida (26), Jeferino Marques (18), Alexandre Marques (24), Cedelizio Rêgo (12), Angelino de Jesus (8), Jesunho Gonçalves (17), Delvio Lobo (11), António Crsitovão (32).
Jornalista: Hortêncio Sanchez
Editora: Maria Auxiliadora
