OÉ-CUSSE, 26 abríl 2024 (TATOLI) – Polísia Nasionál Timor-Leste (PNTL) liuhusi Unidade Patrullamentu Fronteira (UPF), kuarta ne’e realiza border meeting ho Satuan Tugas Pengamanan Perbatasaun (Satgas-Pamtas) Forsa Nasionál Indonézia, Angkatan Darat (TNI-AD, sigla indonézia) Sektor Barat Yonkav 6 Naga Karimata, hodi deskute atu haforsa seguransa iha liña fronteira.
Sorumutu ne’e realiza iha postu seguransa Haumeni-Ana, suku sub-rejiaun Pássabe, Rejiaun Administrativa Administrativa Espesiál Oé-Cusse Ambeno (RAEOA).
Notísia relevante UPF-Satgas TNI organiza patrulla konjunta iha fronteira Haumen-Ana
Komandante UPF, Superintendente Polísia Euclides Belo, informa, prezensa Satgas ho UPF iha liña fronteira postu Haumeni-Ana, importante tebes, nune’e presiza realiza border meeting espesiál ida, atu deskuti oinsá bele haforsa liután liña koordenasaun serbisu hamutuk ba asuntu seguransa iha liña fronteira.
“Sorumutu ohin ne’e espesiál tebes no importante ba ita hotu iha postu Haumeni-Ana, tanba liuhusi border meetig ne’e, atubele otimiza ita-nia serbisu iha liña fronteira ba ita-nia komunidade rai rua entre Timor-Leste ho Indonézia,” Euclides Belo, ko’alia iha ámbitu sorumutu ne’e, iha postu Haumeni-Ana.
Euclides Belo, rekoñese durante ne’e prátika tranzasaun dalan ilegál, kontinua eziste tanba nesesidade, maibé volume hahú menus, tanba ne’e parte seguransa liuliu UPF ho Satgas kontinua komunika atubele promove diskusaun nune’e bele asegura asuntu seguransa iha fronteira sira.
Notísia relevante: FOTO ATUÁL: UPF ho TNI idaidak ho nia Bandeira nasaun nian iha fronteira
Komandante Satuan Tugas Pengamanan Perbatasaun Sektor Barat, Letnan Kolonel, Ronald Tampubolon, informa, mumentu sorumutu ne’e atu haforsa liña koordenasaun ne’ebé maka durante ne’e hala’o husi parte rua ekipa UPF ho Satgas iha liña fronteira sira espesialmente iha sektór barat.
“Tanba ita reforsa katak, atividade ilegál durante iha fronteira volume boot, maibé ikus-ikus ne’e iha mudansa tún, ida-ne’e tanba esforsa koletiva husi kolega UPF, ne’ebé serbisu hamutuk ho Satgas kuaze fulan neen ona, hatudu progresu mudansa to’o ohin loron, no situasaun la’o hakmatek no kontroladu, entaun presiza hamutuk hodi haforsa liután ita-nia liña koordenasaun ne’e,” nia katak.
Autoridade seguransa ne’e, reprezenta ekipa espera bainhira iha akontese erru ka obstaklu ruma iha liña fronteira sira, bele kaer liman hamutuk buka meiu atu-bele rezultadu ho di’ak, nune’e ba oin bele hametin liután kooperasaun hodi kontribui asegura liña fronteira.
Notísia relevante:UPF la tolera sidadaun ne’ebé prátika atividade ilegál iha liña fronteira
Entretantu, totál pilár sira iha sektór barat hahuú husi fronteira Wini-Sakato ba to’o fronteira Naktuka-Oépoli hamutuk pilár 585, husi númeru ne’e iha fronteira Haumeni-Ana sub-rejiaun Pássabe hamutuk 19.
Jornalista: Abílio Elo Nini
Editór: Evaristo Soares Martins
