BAUCAU, 12 setembru 2023 (TATOLI) – Veteranu postu Baguia husu governu atu dignifika mártir pátria nu’udar eroi ba ukuan rasik aan no kontinua fó atensaun ba veteranu sira hotu ne’ebé sei moris.
Portavós veteranu postu Baguia atuál administradór postu administrativu, António Ramos ‘Hadomi’ esplika, veteranu barak mak kontribui iha luta ukuan aan durante tinan-24 ne’ebé rezulta barak mak lakon vida no barak ne’ebé sei nafatin moris iha susar-laran durante Timor-Leste hetan liberdade.
“Ami husu ukun nain-sira atu fó atensaun ba eroi ne’ebé mate ona no sira-ne’ebé sei moris liuhosi fó atensaun no dignifika ba sira hanesan mós ho eis titulár sira tanba veteranu fó sira-nia aan no vida tomak maibé ikus veteranu sira hetan de’it oituan, enkuantu eis titulár sira mak goja liu,” Portavós veteranu postu Baguia hateten iha postu Baguia, segunda ne’e.
Liuhosi konferensia imprensa, veteranu no autoridade postu, suku, aldeia ho komunidade re-afirma pozisaun luta ba ukun rasik aan ne’ebé durante tinan-24 kontribui luta tanba mosu grupu no pesoál balun hahú la konsidera komunidade Baguia luta ba ukun aan.
Administradór Baguia ne’e, argumenta, kontribuisaun povu Baguia hahú kedas inísiu invazaun Indonézia iha rai Lorosa’e iha tinan-1975 to’o mosu levantamentu masakre boot rua hanesan iha tinan-1980 no tinan-1983 liuhosi asaun operasaun iha postu Baguia ho objetivu katak hato’o ba mundu internasionál katak funu iha Timor Leste seidauk remata.
“Levantamentu rua-ne’e atu hatudu ba mundu katak funu iha Timor Leste sei eziste, nune’e mak komandu fó orientasaun ba ita-nia maluk sira hosi vila laran no hosi frente armada organiza mai asalta iha Baguia,” António Ramos konta tuir.
Rezultadu hosi asaun rua refere, komunidade suku sanulu inklui suku Atelari, postu Laga hetan konsekuénsia ba kastigu ka destera ba Atauro, Aileu, Dili, Baucau, Saelari-Laga no iha Baguia.
Nune’e veternu hamutuk o komunidade inklui autoridade lokál deside harii plaka rua ba levantamentu iha postu Baguia nu’udar komitmentu ba luta ukun rasik aan no fó hanoin ba jerasaun foun sira kona-ba prosesu luta iha postu Baguai.
Jornalista : Natalino Belo
Editór : Evaristo Soares Martins
