KOVALIMA, 13 Marsu 2026 (TATOLI) – Xefe Suku Belulik Leten, Postu Administrativu Fatumea, Oscar Perreira Amaral apresia polítika Ministériu Edukasaun (ME) koloka profesór ba eskola sira.
“Nonu Governu konstuisionál liuhosi Ministériu Edukasaun nia polítika hala’o rekrutamentu hodi halo kolokasaun profesór ba eskola sira-ne’e ami apresia,” Xefe Suku Belulik Leten, Oscar Perreira, ko’alia iha resintu AMC.
Líder Komunitária hato’o apresiasaun ba ME tanba iha 2026 ME mós koloka profesór ba eskola Sekundáriu Jerál Fatumea hodi hanorin alunu sira.
“Problema kona-bá edukasaun iha polítika nonu Governu halo rekrutamentu ba iha profesór sira ha’u agradese katak iha tinan ne’e ita hetan kolokasaun, ita-nia manorin na’in sira husi ensinu Sekundáriu Jerál hanorin hela iha ensinu Sekundáriu filiál Fatumea,” nia dehan.
Xefe Belulik Leten ne’e mós kontinua husu ba Ministériu edukasaun atu kontinua koloka tan profesór ba eskola sira nune’e bele garante kualidade Edukasaun iha Timor Leste.
Iha loron 5 Marsu 2026, Profesór na’in-83 aprezenta sira-nia aan ba Servisu Edukasaun Munisípiu Kovalima, molok atu ba hanorin iha eskola ne’ebé mak Ministériu Edukasaun koloka ona.
Ministériu Edukasaun koloka profesór sira ba eskola sira hanesan ba EBC Ladi na’in-hitu, Suai Loro na’in-sia, eskola wematan 11 no eskola seluk ne’ebé mak identifika ona.
ME koloka profesór sira ne’ebé maioria husi Kovalima oan na’in-17, balun husi munisípiu sira seluk nune’e husu atu halo koordenasaun ho diretór no koordenadór eskola sira nune’e hodi buka hela fatin atu hela.
Jornalista:Celestina Teles
Editór: Evaristo Soares Martins
