DILI, (TATOLI) – Ekipa YMCA hahú buka pontus 3. Hosi jogu tolu liu-ba, klubu refere monu tanba lakon dala rua, impata dala ida. Maibé, tanba ambisaun atu lidera grupu B, YMCA hadi’a daudaun ninia performance jogu.
Hosi jogu dala haat ne’ebé hala’o iha Estádiu Munisipál Dili, kinta horsehik, YMCA ba dala uluk koellta pontus 3, hafoin dere ekipa Sporting Clube de Timor ho golu 2-1.
Golu rua hosi ekipa YMCA, oferta hosi jogadór hanesan Octavio de Jesus iha minutu 6, no Lucas Soares minutu 47. Úniku golu hosi Sporting Clube de Timor hatama hosi jogadór Domingos Pires iha minutu 88, liuhusi penalidade.
Hosi rezultadu jogu iha horsehik lorokraik ne’e, lori YMCA okupa pozisaun 5 ho pontus 4 hosi klubu 7 ne’ebé maka iha Grupu B Segunda Divizaun Liga Futeból Amadora époka daruak ne’e. YMCA sei iha jogu rua molok termina primeira faze liga segunda divizaun.
Enkuantu, Sporting Clube de Timor Mantein nafatin pozisaun terseiru ho pontus 5, hosi jogu 5, ne’ebé maka ekipa ne’e ultrapasa ona. Provizoriamente, Atletico Ultramar maka kontinua lidera Grupu B ho pontus 10.
Jornalista: Xisto Freitas
Editora: Rita Almeida
