DILI, (TATOLI) – Prezidente Repúblika, Taur Matan Ruak, sente previlejiadu ho jornalista sira nia kobertura ba ninia programa hale’u suku hamutuk 442 iha Timor laran tomak.
“Iha ha’u nia mandatu, ha’u iha previléjiu boot tanba ita boot sira akompaña ha’u hodi halo kobertura ba fatin sira iha Timor laran ne’ebé ema barak la-kuñese, ohin loron ema barak bele kuñese ona”, Xefe Estadu ko’alia asuntu ne’e iha Palásiu Prezidénsia Repúblika, BairuPite Dili, kinta ne’e bainhira entrega sertifikadu rekuñesementu ba jornalista no mídia sira ne’ebé durante ne’e akompaña Prezidente Repúblika nia programa hale’u suku sira.
Tuir eis komandante gerilleiru ne’e katak nia entrega rekordasaun refere la’ós rekuñese jornalista sira nia serbisu, tanba buat ne’ebé jornalista sira halo boot liu fali plaka (rekordasaun) ne’ebé jornalista sira simu.
“Imi nia sakrifísiu, dedikasaun no vontade ne’e, karik ema selu imi hodi la’o hanesan durante ne’ebé imi akompaña ha’u, dala ruma imi barak lakohi. Dalaruma ita han la tuir oras maibé imi la’o ho ha’u ho fuan no laran”, haktuir.
Maibé, Taur hateten iha tempu agora, jornalista mós bele sai inimigu tanba iha nasaun barak ukun na’in sira lori jornalista ba kadeia, selu indeminizasaun inklui iha Timor ne’ebé governante balun lori jornalista ba Tribunál.
Tanba ne’e, nia propoin ba jornalista sira atu kuidadu partidariza mídia sira no hetan influensia hosi polítiku sira. “Maske iha problema sira hanesan ne’e, ba ha’u jornalista sira kontinua hanesan poder ida ne’ebé bele fó sai lia loos. Ema hateten katak faktu ida ka imajen ida, vale liu liafuan rihun ida”, Xefe Estadu haktuir.
Ne’e duni, Taur husu ba jornalista sira atu kontinua inisiativa ne’e, tenke iha vontade no enerjétiku nafatin. Nia mós husu ba mídia na’in sira atu investe iha jornalista sira nune’e jornalista sira bele kualidade iha sira nia profisaun.
“Lori ha’u nia naran rasik, família, família boot Palásiu Prezidénsia Repúblika no povu Timor-Leste nia naran hato’o obrigadu ba ita boot sira nia serbisu. Ha’u orgullozu loos tanba ita la’o hamutuk no dalaruma la repete tan. Ida ne’e akontese dala ida de’it iha ita nia moris ona”, eis jenerál informa.
Aleinde ne’e, nia mós haktuir katak jornalista sira la’ós iha tempu ukun-án maka fó sira nia kontribuisaun maibé dezde tempu rezisténsia.
“Ita nia istória durante funu, ita hotu sente forsa notísia no forsa informasaun nian. Ami iha ailaran iha dékada 80, rona Timor-Leste nia situasaun através rádiu, dala barak ami bidu to’o dút sira ne’e mate tanba senti katak ita la mesak maibé Timor nia naran ema sei ko’alia”, Taur lembra.
Tuir Taur katak papél jornalista fundamentál loos hodi habelar informasaun ba ema hodi hateten buat ne’ebé loos.
Jornalista: Xisto Freitas
Editora: Rita Almeida
