DILI, (TATOLI) – Vise Prezidente Parlamentu Nasionál (PN), António Verdiál husi bankada Kmanek Haburas Unidade Nasionál Timor Oan (KHUNTO) hato’o ba deputadu 65 ne’ebé mai ho kór partidu ida-idak ne’ebé tama ona iha uma fukun Parlamentu Nasionál presiza tau aan hanesan reprezenta povu hodi reprezenta ema ki’ak, povu ai-leba oan sira.
“Iha uma-lulik ida ne’e atan ha’u reprezenta ema ki’ak, susar, ema ne’ebé lahetan biban atu eskola, hakarak fó hatene ba maluk distintu deputadu sira, ita na’in-65, ita mai ho kór partidu polítiku ketak-ketak maibé bainhira ita tama ona iha casa magna (lulik) ita presiza tau ita-nia aan hanesan reprezentante hodi reprezenta ema ki’ak, mukit no povu ai-leba oan sira”, hato’o António iha Parlamentu Nasionál, ohin.
Tanba ne’e, nia husu atu rona malu, respeitu malu, entende malu, buka konsente ba malu, haburas konsiénsia unidade nasionál, hamutuk tau ideia konstrutiva.
Nia hato’o mós ba Governu minoritáriu oinsá atu halo aprosimasaun maibé ida ne’e depende ba Governu atuál ne’ebé iha. “Ha’u pesoalmente iha buat ida de’it, ha’u mai husi partidu ne’ebé iha prezidente feto, ne’ebé hanesan adjuntu komandante ha’u hamriik iha nia kotuk hodi defende”.
Iha nia intervensaun sobre programa Governu Dahituk nian maka Governu presiza tau prioridade ba bee-moos tanba nu’udar umanu ne’ebé moris, iha buat tolu mak importante mak rai, bee no anin.
“Ha’u laiha pergunta ba planu jerál sétimu governu konstitusionál tanba ha’u kompreende kle’an kona-ba saida mak planu jerál”, katak.
Deputadu ne’e informa, sei hamosu pergunta no komentáriu barak ba ministru ka ministra sira bainhira sira lori planu asaun anuál iha uma fukun ne’ebé banati ba planu jerál ne’ebé iha. Nune’e fó sujestaun ba Governu Dahituk no Governu seluk ne’ebé sei mai bainhira nia sei nafatin iha PN maka defende ezizénsia povu kbiit la’ek sira-nian.
“Kestaun estrada no eletrisidade hanesan pontu importante ba povu maibé, hanesan timoroan ita la’ós moris mai ho eletrisidade ne’ebé nabilan, estrada ne’ebé kaber maibé ita moris mai ho ambiente ne’ebé saudavel”.
Maibé bee sai problema boot ba nasaun ida ne’e tanba bee laiha buat hotu sei ladi’ak. “Povu ki’ik hela iha área remota loroloron lori masa lítru lima hodi la’o dook bá (buka bee) hodi uza ba nia nesesidade uma rasik. Bainhira Governu rezolve problema bee, diretamente sira responde ba problema sira ne’ebé agora daudaun nasaun enfrenta hela mak hanesan insufisiente ai-han uma-laran tanba produsaun ai-han la sufisiente”.
António hatutan produsaun ai-han la sufisiente ba povu tanba atu hasa’e produsaun presiza bee no ai-horis mate, kuda moos sei ladi’ak bainhira bee laiha ko’alia kona-ba moris atu hetan saúde di’ak maibé bee atu hemu de’it laiha.
“Bainhira ita rezolve problema bee diretamente ita rezolve má nutrisaun ne’ebé agora aas iha Timor-Leste, ita sei bele rezolve liuhusi moris iha moos nia laran, hasa’e produsaun ne’ebé bele hamenus importasaun aas liuliu ai-han fresku ne’ebé ita konsumu maibé liuhusi importasaun ne’ebé realidade hatudu iha Dili laran”.
Deputadu ne’e dehan, povu Timor-Leste la’ós baruk-teen maibé povu agrikultór lakon sentimentu konfiansa ba Governu. “Povu agrikultór lakon motivasaun tanba ita lamotiva sira, lakon inspirasaun tanba ita la fó inspirasaun ba sira”.
Hatán ba kestaun ne’ebé hato’o husi deputadu António Verdial, Primeiru-Ministru, Marí Alkatiri hatete votu ne’e direitu ida-idak nian no vota konforme nia konsiénsia.
“Sei laiha orientasaun husi leten atu vota sentidu kontráriu. Ha’u respeita tebes ita-boot nia opsaun, vota hamutuk ho ita-boot nia lideransa”.
Jornalista: Maria Auxiliadora
Editora: Rita Almeida
