DILI, (TATOLI) – Prezidente Repúblika, Francisco Guterres Lú Olo, ohin hala’o diálogu ho feto sira husi organizasaun rede feto hodi buka solusaun ba situasaun polítika ne’ebé akontese.
“Feto sira iha organizasaun ida ne’ebé boot reprezenta povu Timor-Leste, tanba ne’e sira mós tenke iha idea ida kona-ba sira nia preokupasaunʺ, dehan Lú Olo.
Xefe Estadu promove diálogu ne’e ho Rede Feto no hetan mós partisipasaun hosi organizsaun sosiedade sívil hanesan Fundasaun Alola, Asosiasaun Ema ho Defisiensia Matan, FONGTIL, Asosiasaun HAK no seluk tan iha salaun Xina Palásiu Prezidensiál Bairo Pité Dili.
Prezidente organizsaun Rede Feto, Judit Diaz Ximenes, hateten diálogu ne’e atu haree impaktu ne’ebé feto sira hasoru relasiona situasaun polítika iha rai laran.
Portavós movimento reformasaun agrária hosi munisípiu Likisa, Madalena Bidau Soares Kasian, hateten situasaun polítika ne’ebé akontese halo povu kiik sira iha área rurál pániku, tanba ne’e husu ba lidér rezisténsia sira atu buka ona solusaun ba problema ne’e hodi dezenvolve Nasaun ne’e.
Diretóra Ezekutivu Fundasaun Alola, Alzira Reis, husu ba Prezidente Repúblika atu foti desizaun ne’ebé sei garante pás no estabilidade hodi la-implika ba moris feto no labarik.
Sorumutu ne’e feto sira husu ba Xefe Estadu atu kontinua promove diálogu ho líder nasionál sira hodi hakotu ona situasaun polítika ne’e.
Diálogu maka kultura timoroan atu buka malu túr hamutuk hodi buka solusaun ba problema ne’ebé mosu.
Hatan ba preokupasaun ne’e, Prezidente Repúblika hateten situasaun polítika iha rai laran sei la-hamosu krize ruma hodi fó impaktu ba povu no Nasaun.
ʺTimor Leste iha problema, tanba ne’e sei buka solusaun ho rapidamente hodi la fó impaktu ba pás no estabilidadeʺ.
Jornalista: Agapito dos Santos
Editora: Rita Almeida
