DILI, (TATOLI) – Sekretáriu Estadu Komunikasaun Sosiál (SEKOMS), Merício Juvinal dos Reis, kompromete atu kontinua buat ne’ebé di’ak husi governasaun anteriór sira no tau aas interese Estadu ho umildade.
“Comitment (kompromisu) atu kontinua saida mak la’o di’ak hodi reforsa Estadu, primeiru. Segundu, tau sees interese pesoál, grupu; serbí Estadu ho umildade, haraik án, lori governasaun besik ba povu no halo ita-nia governasaun ne’e na’in ba povu”, dehan Merício Akara, iha atividade entrega retratu governu konstitusionál da-hitu husi Sekretáriu Estadu sesante, Matias Boavida, iha Palásiu Governu, ohin.
Méricio Akara husu ba funsionáriu tenke iha pontualidade nu’udar kompromisu ida hosi Primeiru-Ministru, Taur Matan Ruak.
“Ida ne’e revolusaun mentál ida, ita la bele tarde bebeik. Ita tenke aplika (pontualidade-red) atu tinan hirak; lima, mai ita halo buat di’ak ruma”, insiste.
Jornalista: Rafy Belo
Editora: Rita Almeida
