DILI, (TATOLI) – Sekretáriu Estadu Arte no Kultura (SEAK) realiza espozisaun pintura entitula “A Memória-Borja da Costa”, hodi komemora loron nasionál kultura nian, 14 outubru nomós asegura implementasaun polítika SEAK nian atu halo promosaun ba arte no kultura.
Espozisaun ne’e loke diretamente husi Sekretáriu Estadu, Teofilo Caldas, ho Ministru Justisa, Manuel Carceres, nomós autoridade relevante timoroan balun ne’ebé partisipa iha abertura espozisaun pintura ne’e.
Sekretáriu estadu, Teofilo Caldas, iha abertura hateten saudozu Borja da Costa nu’udar sidadaun no poeta timoroan ne’ebé presta servisu importante ba nasaun no kontribui ba luta libertasaun nasionál, hodi hakerek poema oioin no textu rekoñesidu iha nivel nasionál no internasionál, inklui letra inu nasionál Timor-Leste; Pátria, Pátria.
“Timor-Leste iha extrema rikeza em termo de expresaun materiál no imateriál iha ninia kultura, inklui matenek tradisionál ne’ebé mak manifesta iha lian nomós dialetu oioin”, afirma Teofilo Caldas, iha salaun AMRT (Arkivu no Múzeu Rezisténsia Nasionál Timor-Leste), kuarta kalan (21/11).
Sekretáriu estadu ne’e katak selebra rikeza no diversidade kulturál ida ne’e mak estadu Timor-Leste eskolla loron 14 outubru-loron nasimentu saudozu Borja da Costa, nu’udar loron kultura nasionál.
“Serve hodi hanoin hikas no fó omenajen ba nia figura ba sensibilizasaun opiniaun públika ba nesesidade hodi dignifika kultura no artista nasionál”, akresenta hodi haklaken poema saudozu Borja da Costa hakerek ho objetivu sensibiliza povu oprimidu.
Sekretáriu Estadu informa atividade ne’e moris husi artista timoroan sira ne’ebé mak serbisu iha SEAK.
“Tanba importánsia kultura husi espozisaun no exelente serbisu husi joven artista sira ne’e mak Sekretáriu Estadu Arte no Kultura sei lori espozisaun ida ne’e ba iha fatin seluk, liliu eskola sira, sosiedade sívil, nune’e bele asesu ba valiozu traballu joven artista sira no tempu hanesan bele koñese eroi eskrita timoroan”.
Iha fatin hanesan, pintór ida, Leovigildo Smith da Silva, hateten nu’udar timoroan sente apresia tanba iha ita-nia ukun na’in ida, ita-nia na’i-ulun ida hanesan Borja da Costa ne’ebé transmite istória Timór nian, buat ne’ebé povu hasoru liuhusi poesia; ikus mai sai hanesan símbolu ida ba timoroan.
Nia informa mós pintura ne’ebé nia halo no pinta bazea ba obra literatura, bazea mós ba Saudozu Borja da Costa nian nomós ko’alia liu kona-ba invazaun, kolonializmu, durante tama iha ita-nia rain; kastigu, maltratu, buat ne’ebé halo durante tinan barak nia laran.
“Liuhusi arte ita bele muda, ita bele hadi’a, la’ós de’it asaun, maibé liuhusi pintura, ita bele expresa ba públiku nomós saida de’it mak ita hakarak”, hateten pintór Leovigildo Smith da Silva.
Entretantu, iha abertura, halo mós deklamasaun poema saudozu Borja da Costa nian ;Kadalak, diretamente husi Ministru Justisa, Manuel Carceres, akompaña ho aprezentasaun múzika akústika ho letra saudozu Borja da Costa nian.
Pintura sira ne’ebé aprezenta durante ezpozisaun pinta husi artista no pintór timoroan sira hanesan Marcos Silva (Ela Vencerá), Leovigildo Smith da Silva (Borja da Costa, O Resto da Sua Passagem, Demagocicamente), Marcos da Silva (Libertador da Pátria, O Povo Maubere Não Pode Ser Escravo de Mais Ninguém), Carlos da Costa (O Grito do Soldado Maubere, Povo Maubere), Cosme do Rosário Viegas (Pátria, Pátria), Noemia de Sousa (O Sangue Vertido, Estrela Dalva).
Jornalista: Rafy Belo
Editora: Rita Almeida
