DILI, (TATOLI) – Klibur Foinsa’e Humanitarian (KFH) halo graduasaun dala ualu ba estudante kursu lian inglés no portugés na’in 429, kompostu husi sentru haat hanesan Bekora, Kuluhun, Lahane Orientál no Kaikoli ho totál klase 32, hafoin kursu fulan tolu.
“Ohin loron finaliza ona maibé la signifika sira aprende to’o iha ne’e. Objetivu serimónia ne’e atu nafatin motiva, inspira alin sira para hakat ba oin aprende nafatin, iha nafatin espiritu vontade, hakarak hateke ba dook ho Klibur Foinsa’e Humanitarian ne’ebé mak hatuur ona iha nia vizaun katak timoroan hotu tenke matenek”, hateten Prezidente KFH, Chiquito Soares, ba jornalista sira iha salaun Universidade Orientál Timor Lorosa’e (UNITAL), Avenida Liberdade Imprensa, Bekora, ohin.
Nia akresenta fulan tolu nia laran aprende seidauk to’o, esforsu nafatin. “La’o durante fulan tolu ne’e, hetan difikuldade, problema barak, husi faze ida ne’e ita aprende hakat ba oin nafatin”, dehan Prezidente Chiquito Soares.
Chiquito Soares esplika ko’alia kona-ba voluntáriu, iha tempu ohin loron, iha ema ida, rua de’it. Hakarak Timor ne’e sai di’ak, Timor ne’e dezenvolvidu, furak tau iha konsiénsia sidadaun nian, responsabilidade, hanoin para tenke halo buat ruma. Ita ko’alia dezenvolvimentu hanesan referénsia luta ba libertasaun ne’e ho voluntáriu.
Uluk ne’e sira la promete katak luta para to’o loron ikus sai veteranus ka hetan pensaun, bainhira uluk sira dedika sira-nia án.
“Hanesan jerasaun foun, joven, estudante tenke kontinua sira-nia obra ne’ebé mak husik hela, nafatin ho espiritu voluntáriu para dignifika, valoriza sira-nia obra ne’ebé husik hela mai ita”.
Maske tuir nia hanesan filozofia katak ita ema moris la’ós ho osan, ita ema moris husi ema. Ema moris presiza osan atu moris. Ita la hetan osan, ita sei moris. Maibé, ema ne’e moris mak foin buka osan. Serbisu voluntáriu, ne’ebé Klibur Foinsa’e Humanitáriu hatudu, hodi kontinua valoriza ita-nia eroi sira ho sakrifísiu.
“Entaun nafatin dezenvolve maske osan la iha. Maibé, ami iha espiritu, vontade, morál, nafatin atu kontinua”, tenik tan.
Iha fatin hanesan, Reprezentante graduadu sira, Dircia Agostinha da Costa, husi sentru Kaikoli, ba jornalista sira haktuir KFH anima sira la’ós de’it ho kursu lian ingleza nomós portugeza maibé ho atividade barak hanesan puízia, diskursu, dansa kultura nomós seluk tan. Nune’e sente kontente tanba simu ona sertifikadu.
“Simu sertifikadu atu nune’e ita bele hatene durante tempu aprendizajen ne’e la’o oinsá no ita-nia valór, ita-nia rezultadu ne’e iha duni”, hateten reprezentante ne’e.
Ba mídia sira, nia konfirma ho sertifikadu ne’e nia bele hatene nia valór sira no buka hadi’a di’ak liután iha futuru.
“Liuhusi sertifikadu ne’e maske ki’ik maibé bele lori ita ba iha fatin ne’ebé mak ita mehi ba”, konklui Dircia.
Tema graduasaun mak Populariza Edukasaun ba Ema Hotu Liuhusi Servisu Voluntáriu hodi Kontribui ba Dezenvolvimentu Nasionál.
Partisipa iha serimónia graduasaun ne’e kompostu husi inan-aman, autoridade lokál inklui estudante alumni KFH.
Iha graduasaun ne’e, iha mós aprezentasaun husi reprezentante graduadu, Dircia Agostinha da Costa, halo diskursu públiku spontanea ho lian portugés, ne’ebé nota katak fluente tebes ho tópiku Jovem Ontem, Hoje e Amanhã, no intervensaun Prezidente CNJTL (Konsellu Nasionál Juventude Timor-Leste-sigla iha portugés), Maria Dadi Magno, kona-ba Partisipasaun Juventude ba Dezenvolvimentu Nasionál iha Era Ukun Án.
Nune’e mós Reitór UNITAL, Florindo Pereira, ho tópiku Papel Universitáriu iha Mundu Akadémiku. Inklui, Eis-Sekretáriu Estadu Juventude no Desportu (SEJD), Leovigildo Hornay.
Jornalista: Rafy Belo
Editora: Rita Almeida
