PDHJ Hato’o Ona Rekomendasaun Lei Anti Korrupsaun Ba PN

DILI, (TATOLI) – Prevedora ba Direitu Ema-Nian no Justisa (PDHJ-sigla portugés), Jesuina Maria Ferreira Gomes, hatete kuarta semana ne’e ninia parte halo ona audénsia ho komisaun A parlamentu ne’ebé trata asuntu lei no justisa hodi hato’o rekomendasaun kona-ba governasaun di’ak no diretu ema-nian ne’ebé liga ho lei anti korrupsaun.

Iha audénsia, PDHJ foka liu ba medida prevensaun, tanba iha esbosu lei ne’e la hakerek meiu prevensaun barak liu, maibé lei ne’e artigu barak liu halo kriminalizasaun ba aktu korrupsaun.

Hosi aspetu boa governasaun, ninia parte fó hanoin kona-ba uza rekursu ne’ebé ezisténte iha komisaun anti korrupsaun, tanba Komisaun Anti Korrupsaun iha investigadór espsializada hodi halo investigasaun, nune’e labele forma tan ekipa inkeritu seluk hodi aumenta despeza Estadu.

“Iha parte boa governasaun, seluk ida maka inkompetensia iha lei ne’e atu haree didi’ak kompeténsia kada autoridade para labele iha sobre posizaun, tanba iha lei ne’e temi ministériu públiku, polísia”, afirma nia ba jornalista sira iha edifísiu ministériu justisa, Kaikoli, ohin.

Nia haktiur tan hosi parte diretu ema-nian, PDHJ rekomenda atu lei ne’e asegura nafatin diretu ba privasidade, propriedade  no diretu ba liberdade.

Jornalista: Agapito dos Santos

Editora: Rita Almeida