DILI, (TATOLI) – Diretór Jerál Sekretariu Estadu Formasaun Profisionál no Empregu (SEFOPE), Paulo Alves, rekoñese traballadór timoroan ne’ebé haruka bá serbisu iha Korea Súl balu hela kleur liu iha ne’ebá.
“Konserteza tama ona ilegál tanba sira bá tinan tolu, lima de’it, maibé sira balu ne’ebé bá to’o agora seidauk fila”, Paulo afirma iha Kaikoli, ohin.
Tanba ne’e agora daudaun SEFOPE esforsu maka’as hela liuhusi adidu ho embaixada Timor-Leste iha Korea Súl para tau atensaun, nune’e haruka sira filafali mai Timór.
Paulo dehan iha 2017 Timor-Leste okupa fatin da-neen ba traballadór ne’ebé komete irregularidade tanba númeru barak tebes, maibé halo esforsu tomak nune’e númeru ilegál ne’e konsege tun duni liuhusi serbisu adidu nian.
Totál ne’ebé fila ona mai Timór, kompozisaun ba sira ne’ebé maka kontratu hotu, ba sira ne’ebé moras, ne’ebé la aguenta ho serbisu no mate ne’e hamutuk 823.
“Agora, 2300 maka sei hela iha ne’ebá. Husi 2300 ne’e iha númeru uitoan maka sei tama iha irregularidade tanba númeru ne’e ita tenke halo serteza ho relatóriu ne’ebé adidu sira hato’o mai no deteta mós mai husi relatóriu ne’ebé Ministru Traballu Korea Súl nian katak númeru hira maka tama hela situasaun irregularidade”.
Iha 2017 ba 2018, Timor-Leste iha traballadór hamutuk 118 maka komete irregularidade no kompara ba 2016 ba kraik iha númeru boot pur volta 200 to’o 300 maka envolve iha ne’e.
“Maibé iha 2017 ita hela iha 118, agora, espera katak númeru ne’e tun tiha ona tanba traballadór sira mós harii tiha ona sira-nia asosiasaun traballadór timoroan iha Korea Súl no tinan-tinan ita enkontru ho sira, infelizmente 2017 no 2018 la bá enkontru ho sira tanba impase polítika”, Diretór Jerál ne’e relata.
Jornalista: Maria Auxiliadora
Editora: Rita Almeida
