DILI, 29 jullu 2019 (TATOLI)-Governu liuhosi Sekretáriu Estadu Protesaun Sivíl, Alexandrino Araújo, ohin, orienta ona Diresaun Bombeiros no Seguransa Sivíl hodi hahú rega rai rahun no ai funan sira iha kapitál Dili iha ámbitu preparasaun ba komemorasaun tinan 20 konsulta popular (30 Agostu 1999-30 Agostu 2019) no mós festeja loron forsa INTERFET iha Timor-Leste.
“Bombeiros hahú rega ona rai rahun ba fatin sira ne’ebé maka sai hanesan dalan ba bainaka importante (VIP) sira atu liu,” hateten Alexandrino Araújo, ohin, bainhira partisipa limpeza iha Largo Lecidere, Dili.
Trosu ka dalan sira ne’ebé importante tenke mós mak hanesan Jardín Largo Lecidere, Kampu Futeból, Estatua Na’in Feto Lesidere, Palásiu Prezidente, Jardim 5 de Maiu, Colmera, Jardín Igreja Motaél, Aeroportu Prezidente Nicolau Lobato no área Ponte CPLP nian mai borus to’o iha Ponte B.J. Habibie, Lecidere.
Alexandrino Araújo informa, ekipa servisu hosi protesaun sivíl sei koopera ho komisaun organizadora hodi destaka ekipa ba fatin importante sira ne’ebé maka VIP sei liu atu garante ambienta ida moos no seguru.
Oportunidade ne’e, Komandante Nasionál Bombeiros, Claudio da Silva, hatete, nia parte prontu ezekuta orientasaun ne’e hodi halo limpeza jerál hahú hosi jardín sira atu kuidadu no rega ai funan inklui fatin serimónia konsentrasaun no komemorasaun iha área Tasi Tolu.
Jornalista : Ozória A. Marques
Editór : Francisco Simões
