DILI, 31 jullu 2019 (TATOLI)—Prezidente Agência TATOLI. I.P, José da Costa konsiente katak TATOLI nia jornada ba tinan tolu (2016-2017) la’ós fásil.
“Iha jornada ba tinan 3 nian, la’ós buat ne’ebé fásil no hakat ho lalais kedas tuir públiku nia espetativa. Pelu kontráriu, ho situasaun no sirkunstánsia hotu ne’ebé ita-nia nasaun infrenta, difísil no todan tebes mai TATOLI nia ezisténsia, iha periudu ne’e tomak atu sobrevive. La’ós de’it laiha rekursu, maibé mós la konsege atu estabelese estrutura ida própriu atu tau-matan no lidera instituisaun ida ne’e,” nia haklaken liuhusi ninia deskursu iha seremónia aniversáriu TATOLI. I.P. ba datoluk (27 jullu 2016-27 jullu 2019) no lansamentu TATOLI Embiaun ba Institutu Públiku iha Timor Plaza, Dili, ohin.
Nia haktuir, buat ne’ebé nia orgullu no sai ema barak orgullu mós, mak ekipa ida ho ema jornalista na’in 7, tékniku na’in 3 ne’ebé destakadu hosi Sekretaria Estadu Komunikasaun Sosiál (SEKOMS), hosi kedas nia lansamentu iha 2016, nunka husik ka abandona TATOLI iha loron ida. Sira uza sira nia rekursu hotu-hotu ne’ebé iha hodi serbisu. Sira hetan fatin oan ida iha Palaçio do Governo nu’udar sira-nia news room atu serbisu no prodúz notísia. Sira tau fiar ba malu hodi kontinua la’o no hetan akompañamentu hosi SEKOMS liuhosi Diresaun Nasionál Diseminasaun Informasaun, iha lideransa Diretór Sesante nian.
“Maski situasaun difísil ida ne’e la’o iha tinan 2 ho balun nia laran, dezafia sira nia espíritu serbí no profesionalizmu nu’udar jornalista, sira oferese-án, sira tuba rai metin, hodi kontinua presta responsabilidade ne’ebé tula iha sira nia kbaas, hodi hatutan nafatin informasaun ba públiku. Ida ne’e inkomparável tebes. Tanba ne’e, ha’u-nia orgullu no admirasaun rohan laek ba sira,” Prezidente Tatoli lembra.
Iha dezembru 2018, nia esklarese, bainhira nia aseita prosesu nomeasaun sai Prezidente Konsellu Diretivu TATOLI ba mandatu tinan 4, nia konsiente ba situasaun ne’ebé TATOLI infrenta dadaun iha tempu ne’ebá.
“Biar nune’e, ha’u iha optimizmu boot, katak TATOLI sei di’ak liu-tan no sei dezenvolve-án liu-tan tuir espetativa ema barak nian,” nia tenik.
“Optimizmu ida ne’e iha, tanba ha’u fiar ba ekipa ida ne’ebé serbisu maka’as, iha sentidu pertense ne’ebé sira hatudu ona iha tinan rua ho balun, no iha apoiu másimu hosi Exelénsia Sekretáriu Estadu Komunikasaun Sosiál. Loos duni, katak hafoin liu fulan 7, ita hotu bele sai sasin ba seremónia importante ida ohin—seremónia aniversáriu ba dala tolu (3) no seremónia tranformasaun Embriaun TATOLI ba TATOLI Institutu Públiku.
Jornalista: Julia Chatarina
Editór: Xisto Freitas
