DILI, 03 agostu 2019 (TATOLI)—Koordenadór Informasaun ba Komemorasaun Loron Konsulta populár Ba Dala-20 (30 Agostu 1999-30 Agostu 2019), ohin, afirma katak Centro Nacional Chega (CNC) hanoin katak ita-nia memória pasadu nian importante, liliu ba jerasaun foun sira para bele hatene oinsá tinan naruk liu ba ne’e husik hela memória naruk no moruk iha ita-nia istória.
Dalaruma ita ko’alia kona-ba moris pasadu, ita-nia hanoin kona-ba eroizmu, ita-nia hanoin kona-ba ita-nia luta-na’in sira, ita-nia hanoin kona-ba ema ne’ebé sai beibeik iha eventu públiku sira ko’alia kona-ba sira-nia partisipasaun iha luta hodi haluha tiha ita-nia artista múzika sira-nia kontribuisaun.
“Ita haluha tiha katak memória pasadu sira ne’e, transforma mós ema liuhusi sentidu oioin. Ita-nia artista sira, ita-nia kompozitór múzika sira mós parte ida ne’ebé signifikante tebes oinsá mak transforma ema-nia sentimentu liuhusi aiknanoik no liuhusi hananu sira ne’e. Entaun, kompetisaun grupu korál múzika rezisténsia ida ne’e, nu’udar parte ida atu dignifika no atu fó valorizasaun, fó kuñesimentu ba artista no kompozitór múzika sira ne’e,” dehan Koordenadór Informasaun, Hugo Fernandes, uainhhira loke abertura ba Kompetisaun Grupu Korál Múzika Rezisténsia ba Grupu A iha Salaun Centro Convenção Dili (CCD), Merkadu Lama, dili, sábadu (03/08/2019).
Bainhira halo kolesaun ba múzika sira ne’e, nia hatutan, parte CNC mós dalaruma hakfodak tanba múzika sira ne’e dalaruma mosu iha sentidu oioin no iha forma oioin. Balun ita rona katak ne’e múzika domin no múzika kona-ba inan-aman maibé afinál nia sentidu buat seluk.
“Hahú kedas iha 2018, Centro Nacional Chega! (CNC) halibur múzika sira ne’e, husu ba kompozitór múzika orijinál sira ne’e, bainhira sira hatama múzika ne’e mai, tenke konta istória. Tanbasá mak múzika ne’e iha? Múzika ne’e iha sentidu ba nia án rasik ou tanba nia halo reflesaun ruma ba ita-nia memória. Ida ne’e mak partisipasaun artista no kompozitór sira-nian iha ita-nia luta ida ne’e,” nia informa.
Tanba ne’e, nia fó razaun, iha tinan ida ne’e ita halo Festival Kultura Rezisténsia Populár. Katak, ita-nia luta ne’e la’ós ema ida-nian de’it, luta grupu ida-nian de’it, maibé populár ne’e dehan ema barak ne’ebé mai husi ema fatin oioin hanesan artista múzika no poeta sira mós kontribui iha luta ida ne’e.
Múzika hirak ne’ebé halo ona kolesaun, nia haktuir, ekipa juri ne’ebé kompostu husi Pe. Adérito Manuel Euclides Victor da Costa, Domingos “Mitu” Freitas no Paulo Perreira halo tiha ona ninia notas para aban bainrua sé de’it mak hakarak dere múzika, fasil ba sira atu dere múzika tanba iha ona notas.
Tuir nia, interesante liu mak iha loron aban nian, ita tenke introdus múzika sira ne’e ba estudante sira iha eskola sira iha Timor-Leste liuhusi konkordansia ne’ebé halo ho Ministériu Edukasaun atu bele hanorin múzika sira ne’e iha eskola.
Tanba, nia haklaken, ita presiza introdus muzika sira ne’e ho nia istória breve para ita-nia jersaun foun sira bele hatene mós ita-nia memória pasadu. Tanba, nia dehan, bainhira nasaun ida laiha memória, nasaun ne’e laiha futuru.
Nia haktuir, kompetisaun ne’e realiza bazeia ba CNC nia mandatu ida katak ‘atu introdus ita-nia memória pasadu ba juventude no estudante sira’ hodi halibur fila fali múzika sira ho karakter rezisténsia ne’e hodi bele introdus ita-nia kurrikulu disiplina istória no disiplina direitus umanus iha eskola, liuhusi asina nota de intendimentu ida ho Ministériu Edukasaun.
Iha eskola primária no sekundária sira ne’e, nia hatutan, iha matéria ida kona-ba arte beleza. Infelizmente arte beleza mai introdus ita-nia múzika, ita-nia poema sira ne’ebe mak iha sentidu ba ita-nia pasadu.
“Ba kompetitór sira, ha’u hanoin ohin kalan ita marka istória ida. Tanba, ita-boot sira-nia partisipasaun kontribui mós ba dignifika luta populár ne’ebé povu ida-ne’e halo durante tinan 24 nia laran. Kompete ho didi’ak no kompete ho dignu. Tanba sé de’it mak manan, ita hotu mak manan no povu Timor mak manan,” Hugo tatoli.
Notísia relevante: http://www.tatoli.tl/2019/08/03/cnc-sei-fornese-muzika-rezistensia-10-ba-eskola-sira/
Jornalista: Cancio Ximenes
Editór : Rafy Belo
