KM Aprova Proposta Dekretu-Lei Tolu Iha Área Justisa

DILI, 20 novembru 2019 (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira, informa reuniaun Konsellu Ministru (KM) iha kuarta ne’e, aprova ona Proposta Dekretu-Lei tolu iha área justisa, ne’ebé aprezenta hosi Ministru Justisa, Manuel Cárceres.

“Konsellu Ministru simu proposta tolu no husu aprovasaun ba Rejime Atividade Sentru Formasaun Jurídika no Judisiál (CFJJ-sigla portugués), Estrutura Orgánika Sentru Formasaun Jurídika no Judisiál, no Autorizasaun Kuadru Pesoál Ministériu Públiku nian. Tolu ne’e hotu hetan aprovasaun hodi bele implementa husi Ministériu Justisa”, Ministru tenik iha Palásiu Governu, kuarta ne’e.

Diploma kona-ba CFJJ refere atu re-organiza filafali estrutura, liuhosi diploma hierarkia ne’ebé aas no bele reforsa identidade hanesan instituisaun ho kualidade aas iha formasaun jurídika no judisiária, no fó kondisaun orgánika no organizativa ne’ebé adekuada ba kumprimentu importante ba misaun ne’ebé kumpre.

Nune’e mós, fó dalan atu hasai norma hotu ne’ebé konflituante ho rejime sira seluk, ne’ebé maka diploma kona-ba estatutu hosi kareirra profisionál seluk no setór justisa nian.

Ho tempu ne’ebé hanesan intodús mós solusaun foun ba rejime ida ne’e hodi koriji mós prosedimentu no prátika ne’ebé nesesita hosi alterasaun ka hasae kualidade.

Kona-ba diploma kuadru pesoál iha Ministériu Públiku, ho hanoin ida atu kria kondisaun hodi regula dezenvolvimentu iha kareira majistratura Ministériu Públiku, hodi haluan vaga servisu ba fatin-fatin ho karreira ne’ebé hanesan iha kumprimentu hosi ezijensia legalmente estabelesidu no iha kumprimentu objetivu ne’ebé tau ona iha programa VIII Governu Konstitusionál nian, hanesan konsolidasaun iha setór justisa ho rekursu umanu ne’ebé kompetente, independente no profisionál.

Jornalista: Hortencio Sanchez

Editór: Xisto Freitas