DILI, 17 juñu 2020 (TATOLI)-Governu liuhosi Ministériu Saúde ho Ministériu Edukasaun Juventude no Desportu (MEJD) seidauk fó autorizasaun ba Eskola Sekundária Jerál 4 Setembru UNAMET Balide Dili hodi re-ativa ona prosesu aprendizajen ba estudante sira.
Governu hasai desizaun ne’e hafoin halo supervizaun ba eskola ne’e iha kuarta ne’e tanba nota seidauk prienxe padraun prevensaun coronavirus.
“Ha’u observa iha sala aula sira prepara de’it mak bee maibé laiha sabaun, depois bee moos ninia kondisaun la moos, iha sala aula ida mak kondisaun la seguru tanba sei domina hela ho rairahun, nune’e husi ambiente eskola ne’e seidauk halo limpeza másimu parte balun fo’er sei naklekar hela,”informa Diretóra Nasional Saúde Munisípiu Dili, Agustinha Sigurado hafoin halo supervizaun, ohin.
Tuir loloos iha ohin, Ministériu Saúde ho Ministériu Edukasaun Juventude no Desportu abertura ona prosesu aprendizajen ba estudante sira iha eskola ne’ebá, maibé tenki adia tan hodi hadi’a di’ak liután kondisaun balun.
“Ami komprende dirijente no profesór sira ninia esforsu maibé asuntu ne’e sériu ita sei hasoru malu ho estudante sira entaun tenki garante kondisaun eskola ne’e 100 pursentu tenki di’ak no kompleta,”katak nia.
Nia promete Governu sei re-ativa prosesu aprendizajen iha eskola ne’ebá bainhira eskole ne’e implementa ona rekomendasaun husi MS ho MEJD.
Iha biban hanesan Ministra Edukasaun Juventude no Desportu Demisionária, Dulce de Jesus Soares, observa katak eskola ne’e prienxe ona pontu hitu ba prevensaun Coronavirus, maibé desizaun Ministériu Saúde oin seluk tanba ne’e tenki submete hodi hadia di’ak liután kondisaun ne’e refere.
Ohin mós Ministériu rua ne’e halo ona supervizaun ba eskola tolu hanesan Eskola Ensinu Tékniku Vokasionál Becora, EBS Akadiruhun no Eskola Sekundária Jerál 4 Setembru UNAMET Dili.
Husi rezultadu supervizaun eskola rua hanesan Eskola Ensinu Tékniku Vokasionál Becora, EBS Akadiruhun prienxe ona kritéria no tuir planu husi Ministériu Saúde iha kinta ne’e, sei rega ai-moruk dezifentante ba eskola rua ne’e antes hahú prosesu aprendizajen.
Jornalista : Tomé Amado
Editór : Agapito dos santos
