DILI, 11 agostu 2020 (TATOLI)-Klube Futeból hamutuk 20 daudaun ne’e rejistu ona atu partisipa iha kompetisaun kopa Federasaun Futeból Timor-Leste ne’ebé maka tuir planu sei hala’o iha loron 20 fulan-agostu 2020.
Adjuntu Sekretáriu Jerál Federasaun Futeból Timor-Leste (FFTL), Fredérico Martins, hateten komisaun organizadora hahú halo ona verifikasaun ba dokumentu husi Klube hamutuk 20 ne’e.
Notísia Relevante :FFTL Realiza Kopa 2020 ho Osan Rihun $ 200
“Agora iha ona faze verefikasaun, bainhira hotu ona mak ami sei fó fali lista finál ba klube ida-idak nune’e jogu hahú ita iha ona lista jogadór ne’ebé fiksu ona, tanba sira submete ona dokumentu,” dehan nia ba TATOLI iha edifísiu FFTL Bairru Formosa Dili, tersa ne’e.
Klube 20 ne’ebé maka rejista ona ne’e, tuir nia antes ne’e hahaman aan iha Liga Futeból Amadora (LFA) hanesan Lalenok United FC, Karketu Dili FC, DIT FC, Boavista FC Timor, AS Ponta Leste, Assalam FC, AD. SLB Laulara.
FC, Atletico Ultramar FC, Aitana FC, Portu Taibessi FC, Lika-Lika Lemorai FC, Nagardjo FC, FC Zebra, Emanuel FC, Academica FC, Santa Cruz FC, Sporting Clubo de Timor, Kablaki FC, Fitun Studante FC no FC Marca.
Kopa FFTL ne’e sei loke iha Estádiu Munisipál Dili, maibé oitavu finál sei hala’o iha Estádiu Café Gleno Munisípiu Ermera.
“Jogu halao abertura iha Estádiu Dili maibé klube ne’ebé atu joga uluk ita sei dada rifa foin bele hatene. Kona-ba kondisaun Estádiu ami ba haree ona di’ak hotu hein para hala’o jogu de’it,” tenik tan.
Notísia Relevante :Jogadór Brazileiru Fabio Christian Optimista Lori Lalelok FC Hetan Vitoria iha Kopa FFTL
Kopa FFTL ne’e hala’o ho orsamentu hamutuk rihun $ 200 ne’ebé apoiu husi Federation International Football Assosiation (FIFA).
Nia esplika klube sira ne’ebé maka hetan vitória iha eventu ne’e ho klasifikasaun dahuluk sei simu osan $ 15.000, daruak simu osan $ 10.000, datoluk $ 7.500 no ikus liu sei simu $ 2.500.
Jornalista : Hortencio Sanchez
Editór : Agapito dos Santos
