DILI, 02 outubru 2020 (TATOLI)-Primeiru-Ministru (PM), Taur Matan Ruak, agradese partidu opozisaun sira ne’ebé mak partisipa másima ona iha diskusaun Proposta Orsamentu Jerál Estadu (OJE) 2020 Parlamentu Nasionál (PN) durante loron rua iha faze jeneralidade.
“Agradese Parlamentu tanba manifesta apoiu ba OJE 2020 ne’ebé Governu lori ba dala-tolu ona, agradese mós kontribuisaun partidu opozisaun nian durante diskusaun loron rua”, hateten Xefe Governu hafoin aprovasaun proposta orsamentu, iha sala plenáriu, sesta ne’e.
Notísia Relevante: PN aprova proposta OJE 2020 iha faze jeneralidade
Xefe Ezekutivu ne’e garante Governu sei rejista preokupasaun deputadu sira durante debate.
“Governu manifesta esperansa boot katak finalmente hafoin dala-tolu aprezenta OJE 2020, tempu ne’e bele iha rezultadu di’ak ba ita-nia esforsu no kontribuisaun hodi viabiliza orsamentu,” nia subliña.
Nia kompromete atu loron hirak tuir mai iha diskusaun faze espesialidade, Governu sei esforsu responde preokupasaun, perguntas no esklarese dúvida.
Entretantu, Proposta OJE 2020 ho valór billaun $1,497.1 ne’e aprovadu ona iha faze jeneralidade ho votu afavor 44, kontra 0 no bbstensaun 21.
Tuir ajenda diskusaun ba espesialidade sei hahú iha segunda (05/10).
Jornalista: Antónia Gusmão
Editora: Julia Chatarina
