DILI, 20 outubru 2020 (TATOLI)-Fundasaun Alola, iha tersa ne’e, sensibiliza ona informasaun ba Grupu Rede Feto Timor-Leste kona-ba moras kankru susun ho ninia prevensaun sira.
Diretora Fundasaun Alola, Maria Imaculada Guterres, hateten ninia organizasaun iha espetativa ba Grupu Rede Feto Timor-Leste atu fahe informasaun ba inan feton no labarik feto sira kona-ba moras kankru ho ninia prevensaun sira, tanba konsidera Rede Feto iha ligasaun no koneksaun barak liu ho feto sira hahú nasionál to’o suku.
Notísia Relevante:2015-2020, feto na’in 400 sofre kankru susun
”Fundasaun Alola nia espetativa ba grupo Rede Feto mak atu sira bele habelar inforamasaun sira ne’e ba feto maluk sira tanba sira-nia servisu hasoru feto barak no hasoru grupo oioin de’it entaun informasaun sira ne’e la’ós atu hasa’e sira nia koñesimentu maibé bele habelar fila fali ba inan feton sira seluk iha sira-nia servisu fatin,” Ezekutiva ne’e dehan ba jornalista sira iha Salaun Fundasaun Alola, Dili.
Nia dehan deteksaun sedu importante atu bele salva feto sira-nia vida husi moras kankru susun.
”Tanba ita hatene katak kazu avansadu mak domina iha HNGV atu labele akontese beibeik ne’e ba futuru ita tenki desimina informasaun sedu ba inan feton sira para prevene an antes halo kurativu,” nia hateten.
Tuir dadus ne’ebé prodúz husi Fundasaun Alola nian katak komesa 2015 to’o agora rejista ona pasiente ho problema kankru susun hamutuk 150, mate na’in 10, no husi na’in 10 ne’e na’in sia sofre kankru susun no ida kankru serviks.
Iha parte seluk, baseia ba relatóriu ne’ebé fó sai husi Ospitál Nasionál Guido Valadares (HNGV-sigla portugés), hahú 2015 to’o 2020 rejista feto Timoroan hamutuk ema na’in 400 maka sofre moras kankru susun.
Husi númeru ne’e pursentu 80 (%) la konsege rekupera ka mate tanba mai halo tratamentu ho kondisaun grave no labele kura tan moras ne’e da’et ona ba orgaun seluk hanesan pulmaun, aten, ruin no kakutak.
Pasiente ho moras kankru susun ninian maioria ho idade 19 to’o 40.
Notísia Relevante:Livre Hosi Kankru Susun, Labele Moe Ko’alia ba Malu
Jornalista : Felicidade Ximenes
Editór:Agapito dos Santos
