Tinan oin, MAP sei hadi’a irrigasaun ualu

DILI, 04 novembru 2020 (TATOLI)—Ministériu Agrikultura Peskas (MAP) iha tinan 2021 sei hadi’a irrigasaun ualu, nune’e bele intensiva produsaun rai-laran.

“Irrigasaun ne’ebé maka Ministériu Agrikultura Peska atu hadi’a iha tinan oin, ne’ebé hetan aprovasaun hosi Komité Revizaun Orsamentu Polítika (KROP) maka irrigasaun ualu,” Ministru Agrikultura Peska, Pedro Reis, informa iha Palásiu Governu, kuarta ne’e.

Nia dehan, ne’ebé sei hadi’a maka Maliana II, Webaba, Raibere, Bebui, Webaba, Bonuk no seluk tan.

“Ita prioridade hotu maibé osan maka la to’o, tanba ne’e tinan oin ita sei propoin atu hadi’a maibé agora daudaun ita fó prioridade ba iha área pontesiál ne’ebé maka ita haree abandona natar kleur ona,” Ministru informa.

Governante ne’e otimista abinhira hadi’a ona irrigasaun maka sei bele hasa’e produsaun iha rai-laran.

“Inundasaun mai lori bee tuda dook hosi eskema irrigasaun, produsaun sei la sa’e maibé se iha ona irrigasaun ne’ebé di’ak, bee bele la’o di’ak no konserteza  produsaun bele sa’e,” nia akresenta.

Kustu ba reabilitasaun irrigasaun ualu MAP prevee ona iha orsamentu 2021 hamutuk miliaun $2 resin.

Tuir dadus MAP,  tinan 2017 hanesan tempu ne’ebé difísil ba iha agrikultór sira tanba enfrenta situasaun (El Niño), maibé agrikultór sira konsege prodús hare tonelada 36.995,87 hodi rezulta foos tonelada 22.197,25 iha rai laran.

Daudaun ne’e, natar iha rai ektare 2.026,74 mak sei utiliza sistema tradisionál, katak hare kari de’it iha natar laran, du’ut la hamoos, kontrolu ba adubu ladi’ak no rai ektare 9.062,94 mak hare kari, fokit kuda fali, maibé la kuda ho liña no kontrola ba adubu, pestisida no bee ladún di’ak.

Enkuantu ektare 771 maka uza ona sistema prátika no rai ektare 57 mak implementa ona sistema agrikultura ho di’ak, katak hare kuda ho liña, kontrola ba adubu, pestisida, bee di’ak no laiha du’ut.

Jornalista: Natalino Costa

Editora: Julia Chatarina