DILI, 22 fevereiru 2021 (TATOLI)—Lei Medida Prevensaun no Kombate Korrupsaun (MPCC-sigla portugés) ho artigu hamutuk 117, ohin, tama ona entrada ein-vigór tanba kompleta ona loron 180.
Lei ne’e ohin halo lansamentu ofisiál ba implementasaun iha ámbitu selebrasaun loron Komisaun Antí Korrupsaun (CAC-sigla portugés) ba dala-11 hodi hahú aplika lei númeru 7/2020, 26 ne’e. Lansamentu ne’e hala’o iha salaun auditóriu Xanana Gusmão, Ministériu Finansa, Aitarak-Laran, Dili.
Lei númeru 7/2020, 26 agostu kona-ba MPCC ne’e hateten, korrupsaun nu’udar fenómena pernisiozu ne’ebé subverte valór fundamentál vida iha sosiedade. Korrupsaun sei estraga Estadu Direitu Demokrátiku ne’ebé estraga mós distribuisaun rikeza nasionál, fomenta divizaun no atritu sira iha sosiedade. Palavra korrupsaun atenta kontra justisa no armonia sosiál.
Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos ‘Boroluli’, esplika lei ne’e entrada ein-vigór ona maibé Tribunál no Komisaun Antí Korrupsaun (CAC-sigla portugés) sei notífika órgaun hotu-hotu.
“Tribunál sei notifika Parlamentu Nasionál no orgaun soberania sira seluk, Komisaun Antí Korrupsaun sei notifika instituisaun públiku sira. Entrada ein-vigór ne’e bele implementa ona bainhira CAC prepara ona rekizitu sira tuir lei haruka ne’e”, nia informa ba TATOLI liuhosi telemovel, segunda ne’e.
Parlamentu Nasionál aprova projetu-lei MPCC iha loron 20 jullu 2020 no promulga sai ba Lei hosi Prezidente Repúblika Francisco Guterres ‘Lú Olo’ iha loron 24 agostu 2020.
Jornalista: Evaristo Soares Martins
Editora: Cancio Ximenes