DILI, 04 abríl 2021 (TATOLI)–Populasaun balun hosi Bairro Besi Tua, aldeia 12 de Outubro, suku Comoro, postu administrativu Dom Aleixo, evakua bá foho leten João Paulo II, hodi buka netik mahon no fatin maran ruma hodi deskansa iha loron balun nia laran.
Populasaun deside hela provizóriu iha foho leten, hafoin udan ho intensidade boot iha domingu madrugada to’o meiu dia hodi rezulta inundasaun iha fatin-fatin, iha kapitál Dili.
Lia-na’in Bairro Besi Tua, José Xavier Paiseco, hateten área ne’e iha uma-kain 300, ne’ebé balun deside sa’e ba foho leten, enkuantu seluk hela ho família hodi asegura-an hosi dezastre naturál.
“Ami husu ona lisensa ba amu sira atubele hela provizóriu iha tempu balun nia laran ho objetivu atu asegura labarik, inan aman no seluk tan,” Lia-na’in Bairro Besi Tua informa ba Agência TATOLI, iha João Paulo II, Tasi Tolu.
Tuir José Xavier, iha Bairro Besi Tua bee sa’e maka’as halo populasaun tenke buka fatin seguru hodi salva-an.
“Lagoa ida iha Tasi Tolu, bee nakonu hotu kedas no ikus mai hamosu inundasaun hodi rezulta ema barak mak sai vítima, falta ai-han, sasán uma-laran barak maka labele salva.
“Bee nakonu no tahu maka’as iha komunidade sira-nia hela fatin halo sira la seguru hela iha sira-nia fatin rasik,” nia akresenta.
Tanba ne’e, uma-kain ida-idak dada tenda iha João Paulo II hodi buka mahon no bele deskansa.
“Sasán balun ne’ebé bele salva mak hanesan karreta ho motor hodi bele transporta lalais populasaun sira, maibé sasán seluk iha uma-laran labele salva,” nia hatutan.
Nia mós konfesa katak situasaun difisil ne’e halo populasaun komesa falta ai-han.
“Kona-ba hahán, ami hanesan manu fuik ona tamba hahán balun iha uma laran labele lori sai no balun fali lori sai maibé sei la aguenta ba loron hirak tuirmai. Ema boot laiha problema maibé preokupa mak mak labarik kiik-oan sira,” nia tenik.
Maski nune’e, daudaun populasaun iha área Bairro Besi Tua kontinua koopera ho autoridade lokál atubele husu tulun ba Governu.
Jornalista: Domingos Piedade Freitas
Editora: Julia Chatarina
