DILI, 21 abríl 2021 (TATOLI)-Estudante Oé-Cusse oan-sira ne’ebé halo estudu iha Dili, inklui mós negosiante Oé-Cusse oan sira ne’ebé halo atividade negósiu iha kapitál Dili hakarak fila ona ba Oé-Cusse. Tanba ne’e, sira husu ba prezidente autoridade Rejiaun Administrativu Espesiál Oé-Cusse Ambeno (RAEOA) atu fasilita ró lori sira sai hosi Dili.
Liuhosi konferénsia imprensa, kuarta ne’e, iha portaun boot Sekretariadu ZEESM ( Zona Ekonomia Espesiál Sosiál Merkadu), Farol, Dili, portavós Movimentu Atoni Oé-Cusse (MAO), Zecafriado Afulit Coa, afirma sira hakarak fila ba Oé-Cusse tanba relasiona ho situasaun serka sanitária no dezastre naturál iha loron 04 abríl 2021, lori taterus ba estudante no komunidade Oé-Cusse oan iha Kapitál Dili labele asesu ba osan atu selu uma aluga (kost) no asesu ba ai-han atu nesesita ba moris loro-loron nian.
“Husu ba Prezidente Autoridade RAEOA hodi fó autorizasaun imediatamente ba Ró-ahi Success hodi bele transporta estudante no Oé-Cusse oan-sira ne’ebé mak atu halo viajen fila ba Oé-Cusse, atu labele hanaruk estudante no komunidade sira-nia terus iha situasaun kalamidade ne’e,” Zecafriado Afulit Coa, afirma tan.
Iha loron 10 abríl 2021, estudante no abitante hamutuk 200-resin deside atu halo viajen ba Oé-Cusse, maibé la konsege tanba Ró Success, tula de’it pasajeiru hamutuk ema na’in-40 tuir lista ne’ebé oferese hosi Prezidente Autoridade RAEOA ba Autoridade Portuáriu Timor-Leste (APORTIL). Nune’e, Zecafriado Afulit Coa haktuir, estudante ho komunidade Oé-Cusse aguenta tan iha Dili to’o loron 16 mak atu halo viajen ba Oé-Cusse tuir orariu normál viajen husi Dili ba Oé-Cusse iha tuku 15:00 Otl. Maibé, Ró-ahi Success hala’o fali operasaun iha sábadu madrugada, la hanesan oráriu normál hodi rezulta estudante no komunidade s labele halo viajen ba Oé-Cusse.
Haree operasaun Ró Success la kumpre ba oráriu, MAO konsidera desizaun ne’e desizaun diskriminativu no oráriu operasaun Ró Success nian ne’ebé la tuir oráriu normál, ne’e aktu mal informasaun ba atendimentu ba pasajeiru-sira.
Iha loron 20 abríl, MAO hala’o diálogu ho Gabinete ZEESM Nasional iha Farol Dili, maibé la hetan resposta ida hosi gabinete durante diálogu ne’ebé la’o iha oras ida nia laran. Nune’e, MAO husu autoridade hosi Governu liuhosi Ministériu Transporte no Komunikasaun ne’ebé iha kompeténsia no trata asuntu movimentasaun transporte públiku marítima nian, atu toma atensaun no investiga Autoridade Portuáriu Timor-Leste no operadór Ró Success nian ne’ebé mak la hala’o sira-nia servisu tuir oráriu normál.
“Movimentu Atoni Oe-Cusse, fó ami-nia esperansa hodi hein intervensaun Prezidente Autoridade RAEOA no autoridade kompetente atu solusiona preokupasaun estudante no komunidade sira ne’ebé mak atu halo viajen fila ba Oé-Cusse, hodi nune’e bele kore-aan hosi hamlaha, no sofrimentu ba kalamidade ne’e rasik,” Zecafriado Afulit Coa hateten.
Hatán ba preokupasaun MAO nian ne’e Prezidente Autoridade RAEOA no ZEESM, Arsénio Paixão Bano, afirma Oé-Cusse oan sira ne’ebé ezije hakarak fila, bele maibé sei haree mós kondisaun kuarentena Óé-Cusse ne’e mamuk lai tanba agora nakonu, nune’e tenke iha autorizasaun hosi Sentru Integradu Jestaun Krize (CIGC) ka teste swap, tanba Oé-Cusse agora foku loos ho vasina AstraZeneca.
Arsénio Bano husu ba Oé-Cusse oan ne’ebé hala’o estudu no inklui buka moris iha Dili, pasiénsia tanba sei koordena ho CIGC atu halo teste swab, nune’e bainhira estudante fila-fali ba Oé-Cusse labele hamosu transmisaun lokál COVID-19 iha Oé-Cusse.
“Ha’u husu de’it Oé-Cusse oan ne’ebé iha Dili iha situasaun COVID-19 ne’ebé agora iha ona transmisaun komunitáriu iha kapitál Dili, labele la’o tun-sa’e, nune’e moras labele da’et imi,” Arsénio Bano hateten.
Kona-ba problema hahán menus, Arsénio Bano u sei koordena ho Ministériu Solidariedade Sosiál no Inkluzaun (MSSI) iha Dili atu ajuda ba Oé-Cusse oan sira hotu.
Jornalista : Arminda Fonseca
Editór : Francisco Simões
