DILI, 10 maiu 2021 (TATOLI)—Plan Internasionál oferese sasán la’ós hahán liu hosi Sekretária Estadu Protesaun Sivíl (SEPS), hodi bele distribui ba família afetadu dezastre naturál.
Pakote sasán la’ós hahán hanesan sanan 620 pcs, buli chok 620 pcs, bikan plástiku 620 pcs, kanuru han 620 pcs, kopu plástiku 620 pcs, jerigen 20 liter 620 pcs, manta 620 pcs no biti 620 pcs.
Notísia relevante:SEPS-CRS oferese apoiu emerjénsia ba família 178 iha Wenunuk
Iha mós materiál panfletu hamutuk 1.350 kona-bá pakote mensajen informasaun ba prevensaun COVID-19, hodi bele fahe ba komunidade.
Apoiu ne’e, adjunta Diretora Plan Internasionál iha Timor-Leste (TL), Fátima Estrela Soares mak oferese direita ba SEPS, Joaquim Gusmão, iha edifísiu SEPS Caicoli, segunda ne’e.
Fátima Estrela Soares, hateten Plan Internasionál liu hosi projetu Start Fund hetan fundu rihun $40 hodi responde situasaun kalamidade ne’ebé implementa hosi Plan rasik, serbisu hamutuk ho SEPS, nune’e ho sasán sira ne’e sei oferese ba família afetadu ne’ebé vunerável hosi munisípiu tolu.
Dadus ne’ebé parte Plan Internasionál ho SEPS identifika família iha munisípiu tolu mak hanesan Dili hamutuk 220, Ainaro 200 ho Aileu 200 ho totál 620.
“Plan internasionál kontinua hamutuk ho SEPS hodi suporta atu responde situasaun dezastre naturál ne’ebé akontese desde 04 abríl to’o ohin loron,” Fátima Estrela Soares, hateten.
Sekretáriu Estadu SEPS, Joaquim Gusmão agradese ba solidariedade hosi Plan Internaisonál hodi bele tulun família afetadu iha situasaun difísil.
Iha loron dahuluk akontese dezastre naturál 04 abríl, Plan Internasionál serbisu hamutuk ho SEPS, Ministériu Edukasaun (ME), Ministériu Solidariedade Sosiál no Inkluzaun (MSSI), Ministériu Saúde (MS) hodi fó apoiu pakote ai-han ba sentru evakuasaun, pakote aprendizazen no seluk-tan.
Jornalista: Nelson de Sousa
Editór: Cipriano Colo
