OÉ-CUSSE, 29 setembru 2021 (TATOLI)—Governu liuhosi Ministériu Interiór (MI) planea ona iha tinan 2021-2022 sei instala-tán postu seguransa lima (5) iha fronteira Rejiaun Administrativa Espesiál Oé-Cusse Ambeno (RAEOA), hodi prevene pasajen ilegál no kombate variante delta no COVID-19.
Notísia Relevante: Vise-Ministru Interiór enkoraja PNTL RAEOA servisu ho dixiplina
“Ita sei konstrui postu rua. Orsamentu ne’e mai hosi fundu COVID-19. Ita halo postu seguransa urjentemente hodi prevene pasajen ilegal iha fronteira no atu kombate COVID-19. Maibé, ita mós iha postu seguransa tolu ne’ebé Governu mak tau osan atu konstrui. Dezeñu ba postu seguransa tolu ne’e hotu ona. Entaun tinan oin, ita sei konstrui postu seguuransa lima,” Antonio Armindo informa ba jornalista sira iha kuartel PNTL Oé-Cusse, kuarta ne’e.
Daudaun ne’e postu foun sira, iha hela prosesu konkursu ne’ebé la’o hela iha komisaun aprovizionamentu maibé seidauk konklui. Bainhira postu tolu ne’e hetan ona kompaña elizivél sai manan na’in, sei hahú halo kontrusaun iha tinan ne’e to’o tinan oin.
“Governu sei konstrui ida iha fronteira Sakato sub-rejiaun Pante Makasar. Ida iha fronteira Oésilo sub-rejiaun Oésilo ne’e ida. Ida tán iha fronteira parte Citrana, sub-rejiaun Nitibe,” nia dehan.
Aleinde ne’e, iha ninia vizita mai Oé-Cusse ne’e atu observa direta ba postu Unidade Patrollamentu Fronteira (UPF) sira hosi Mota-Ain to’o Suai, no ikus iha RAEOA atu identifika fatin sira-ne’e molok halo instalasaun postu foun sira iha fronteira.
Tuir planu, bainhira Governu halo ona instalasaun postu foun sira iha fronteira, Minitériu Interiór sei propoin hodi loke rekrutamentu foun ba PNTL atu koloka no reforsa servisu iha fronteira, tanba iha instituisaun PNTL mós membru barak idade avansadu ona.
Durante vizita RAEOA, nia parte konsege identifika kondisaun postu UPF sira iha fronteira ladún dignu inklui kazerna, tanba ne’e Governu iha obrigasaun atu rezolve kondisaun hela fatin iha postu sira iha fronteira ho fazeadamente.
“Ita labele hadi’a kondisaun sira hotu dala ida de’it. Tnan ne’e, hadi’a balun no tinan oin sei kontinua hadi’a-tán, tanba bazea ba Orsamentu Jerál Estadu no mós bazea ba desizaun Governu,” nia dehan.
Tuir planu, ein-jerál Governu atu konstrui postu seguransa iha fronteira terrestre hahú hosi Mota-Ain to’o Salele inklui RAEOA hamutuk postu seguransa 13, ho nia orsamentu aloka ona ho montante rihun $990 hosi OJE 2021.
Entretantu, totál fronteira terrestre iha RAEOA daudaun ne’e iha postu segruansa sia (9) mak Postu fronteira iha sub-rejiaun Pante Makasar mak hanesan postu UPF Sakato, Leolbatan, Nun-Ana, iha sub-rejiaun Oésilo mak postu UPF Oésilo, Faotbasin, iha sub-rejiaun Pasabe postu UPF Ato no krus, iha sub-rejiaun Nitibe postu UPF Noa-Ana no Citrana, ho totál membru UPF kuaze na’in-90.
Jornalista : Abílio Elo Nini
Editór : Cancio Ximenes
