COVALIMA, 05 uutubru 2021 (TATOLI)—Diretòr Ministériu Solidariedade Sosiál no Inkluzaun (MSSI), Agapito Asis, informa hahú hosi fulan jullu to’o setembru tinan ne’e, MSSI fó apoiu umanitáriu hodi distribui foos saka 2.253 ba família vulnerável iha munisípiu Covalima.
Notísia Relevante: MSSI distribui foos saka 263 ba família vulnerável iha Suai Loro
“Ha’u hanoin programa fó asisténsia umanitária ba família vulneravél ne’e hanesan programa kontinuasaun, ita haree ba kondisaun no situasaun ne’ebé mak ita-nia komunidade enfrenta iha munisípiu Covalima,” Diretòr MSSI Covalima ne’e hateten ba jornalista sira iha nia kna’ar fatin, Suai Loro, tersa ne’e.
Programa apoiu foos ba família vulnerável ne’e, MSSI servisu hamutuk ho autoridade lokál sira mak identifika família vulnerável sira iha sira-nia suku, hafoin ne’e haruka pedidu ba MSSI atu hetan apoiu ruma.
MSSI kontinua kolabora ho autoridade lokál sira atu identifika família vulnerável, ema ho difisiénsia no grupu orfonatu no ema kbiit laek seluk tán, tanba MSSI fó apoiu ne’e bazea ba pedidu ne’ebé mai hosi autoridade lokál sira.
“Ita foin rekolla hela dadus, hein bainhira dadus iha ona mak MSSI prepara kalendáriu atu halo distribuisaun foos ba família vulnerável sira,” nia dehan.
Estoke foos iha armajen hamutuk saka 2.000, tanba ne’e foos sei sufisiente hela atu apoiu ba família vulnerável sira.
Tuir dadus hosi MSSI relata katak, hahú hosi fulan-jullu to’o setembruu ne’e, MSSI apoiu ona foos ba família vulnerável, grupu vulnerável sira, ema ho difisiénsia no instituisaun seguransa hamutuk 2.253 ba ema na’in 2.434, ne’ebé kompostu hosi mane 804 no Feto 1.630.
Notísia Relevante: MSSI distribui foos ba família vulneravel 216 iha Kamenasa
Jornalista : Celestina Teles
Editór : Cancio Ximenes
