POEZIA
Hosi Maénio Calado
Timor-Leste
Ema wa’in mak funu
Uma kain ida mak goza
Grupu ida mak aproveita
Timor-Leste
Ema wa’in mak luta
Ema seluk mai tabele
Loko haluha aan
Timor-Leste
Na’in laiha valór
Intensaun subar istória
Seluk helik subar
Timor-Leste
Politiku neon mate
Relijioza diuk derrepente
Justisa sosiál sai delek
Timor-Leste
Ohin ema wa’in “yes man”
Ohin, “asal bapak senang””
Ohin metan tenik mutin
Timor-Lese
Ema balun fase liman
Ema balun nega realidade
Ohin traidór mak asswa’in
Timor-Leste
Nakonu ho drama
Naresin ho senáriu
Nabutuk ho lia falsu
Taibessi, 18 setembru 2018
PATRIOTA
Se ha’u patriota oan,
Ha’u neon sei lamonu neon dois be dois hosi doit dolar
Se ha’u patriota oan,
Ha’u neon seli la nabeen, kaben boot, tane liman ba projetu hosi fatin ba fatin
Se ha’u patriora oan,
Ha’u sei neon la moruk, neon mutuk hafahe, harahun, ha’u emar, ha’u maluk
Se ha’u patriota oan,
Ha’u sei la aproveita fama, tebe rai, tuba rai hafoer ha’u liman, haraan ha’u liman
Se ha’u patriota oan,
Ha’u sei la hamoe ha’u lisan, ha’u knuak, ha’u rai lulik, obriga an ba asesor ba kadeira foer
Se ha’u patriota oan,
Ha’u sei kuidadu, bali, daka no defende ha’u-nia fama patriota morin no morin
Se ha’u patriota oan,
Orgullu nu’udar patriota oan, basá patriota naran lulik, naran sagrada
Patriota, ó saran ó vida tomak, ó saran ’o moris, hodi promote, hodi sosa ó liberdade, defende ó rain, ó emar moris nu’udar ema independente
Tan ne’e patriota oan, Keta hamoe, hamonu, hafoer, harahun naran patriota iha projetu, ho dosi dolar, ho soin, basá patriota mate la’os tanba buuat hirak ne’e.
We-Anin, 10 outubru 2021
LIMAN SEI MAMUK
Dadeer abu-abu sei falun
Sai ba to’os
Ai-farina eh fehuk ladauk isin
Fila kohe mamuk
Dadeer nakukun sei falun
Sai ho asu ba kasa
Lasu matan la kamat kona
Fila liman mamuk
Lorokraik nakaras ba meti iha tasi tiha mai
Rede lidun sei mamuk
Fila ho liman mamuk
Loron nakaras ba koko sorte iha bola guling
Oras balun kosar atake
Bolsa mamuk
Fila mamuk
Sé lerek sadik neon
See liman sei mamuk
Sá bodik selok narinan
See kohe-mama sei mamuk
Sá atu hamansa
Se ahi-matan ladauk su’ar
Sá atu hesuk hahaek
Se kabun sei mamuk
Ah fiar sei mamuk
Liman sei mamuk harohan rohan-rohan
Hamamuk soin
Soin sai mamuk
Becora, 08 outubru 2018
Eskritór Maenio Calado, eis jornalista TALIT@KUM no eis staff Comissão de Acolhimento, Verdade e Reconciliação (CAVR) ni Sekretariadu Tékniku Pos-Comissão de Acolhimento, Verdade e Reconciliação (STP-CAVR).
