DILI, 05 novembru 2021 (TATOLI)–Taxa ezekusaun reál fundu COVID-19 to’o agora atinje ona millaun $117,7 ka 41% hosi totál orsamentu retifikativu alokadu millaun $287,6, enkuantu taxa ezekusaun atuál ne’ebé inklui kompromisu no obrigasaun to’o inísiu novembru atinje ona 48%.
Taxa ezekusaun tuir klasifikasaun ekonómiku, a’as liu mak iha kategória bens no servisu ne’ebé mak ezekuta ona millaun $82,9 ka 42% hosi orsamentu alokadu millaun $198,6, tuir kedan ho transferénsia públika ne’ebé ezekuta ona millaun $32 ka 42% hosi orsamentu alokadu millaun $76,2, kapitál menór ezekuta ona millaun $1,1 ka 26% hosi orsamentu alokadu millaun $4,5 no kapitál dezenvolvimentu ezekuta ona millaun $1,5 ka 19% hosi orsamentu alokadu millaun $8,1.
“Tuir projesaun, taxa ezekusaun reál fundu COVID-19 to’o iha fulan-dezembru nia rohan (trimeste dahaat) sei atinje 66%,” refere nota ne’ebé Agência TATOLI asesu iha sesta ne’e
Tuir mai, progresu ezekusaun reál tuir medida sósiu-ekonómiku, hosi programa moratoria kréditu ezekuta ona 100% hosi orsamentu alokadu millaun $2, pagamentu ba programa Cesta Bázika, ezekuta ona millaun $63,9 ka 94% hosi orsamentu alokadu millaun $68,1.
Notísia relevante: Ezekusaun orsamentu ba Moratória Kréditu no Cesta Bázika atinje 100%
Nune’e mós, apoiu ba empregu ezekuta ona millaun $22,6 ka 50% hosi orsamentu alokadu millaun $45,3, apoiu propina ba estudante ensinu superiór ezekuta ona millaun $5,6 ka 40% hosi orsamentu alokadu millaun $14, ba mitigasaun no prevensaun COVID-19 inklui finansiamentu operasaun sentru integradu jestaun krize ezekuta ona millaun $17,1 ka 21% hosi orsamentu alokadu millaun $83,2.
Pagamentu suplementu remuneratóriu ba traballadór liña-frente ezekuta ona millaun $6,2 ka 12% hosi orsamentu alokadu millaun $51,9, no apoiu seguransa alimentár foin mak ezekuta de’it $103.908 ka 1% hosi orsamentu alokadu millaun $12.
Jornalista : Arminda Fonseca
Editora : Julia Chatarina
