DILI, 24 fevereiru 2022 (TATOLI)— Ministériu Saúde (MS), kinta ne’e, realiza reuniaun Komite Nasionál ba Koordenanasaun Setór Saúde hodi avalia progresu intervensaun ba kombate surtu dengue no Covid-19 iha Timor-Leste.
Biban ne’e, Vise Ministru Saúde, Bonifacio Maucoli dos Reis fó orientasaun ba Diretór Nasionál no munisipál sira atu halo intervensaun ba kazu dengue sedu, molok tama ba fulan-dezembru ka udan monu rai.
“Ita tenke antisipa kedas bainhira kazu dengue ne’e mosu, ezemplu fulan dezembru mak kazu sa’e maka’as tanba udan monu rai, entaun antes dezembru ita hotu tenke preparadu ona no labele tarde hodi haree kazu iha ona mak foin halo intervensaun. Ita tenke preparadu hodi halo intervensaun iha nivél nasionál no munisipál to’o iha suku inklui aldeia ba prevene moras dengue,”Vise Ministru Maucoli hateten ba Jornalista iha Palasiu Sinzas-Caicoli, kinta ne’e.
Tuir dadus estatístika Ministériu Saúde liuhosi Diresaun Nasionál Saúde Públika liuliu Departamentu Vijilánsia Epidemolojia, hahú fulan-janeiru to’o horiseik rejista pasiente dengue hamutuk 2.374, hosi númeru ne’e labarik na’in-31 mak mate.
Maioria kazu ne’e deteta husi Munisípiu Dili ho totál 1.488, Baucau 105, Manatuto 142, Covalima 87, Ermera ho kazu 90, Manufahi 96, Viqueque 53, Ainaro 32, Liquiça 82, Aileu 69 no Bobonaro 32 Lautem 95 no RAEOA tolu.
Nune’e, Governante ne’e husu ba Diretór sira iha nivél nasionál no munisipál atu ativu hodi halo edukasaun sivika atu mobiliza autoridade lokál no komunidade halo limpeza jerál iha bairru risku sira.
“Ha’u husu ba parte vijilánsia Epidemolojia atu haree ba fatin sira ne’ebé mak risku bele halo intervensaun lalais molok surtu ne’e alastra ba komunidade sira,” nia akresenta.
Ministériu Saúde kontinua nafatin fó treinamentu ba jestór no pesoál saúde sira atubele haree no halo jestaun ba kazu dengue. Tanba iha fulan janeiru labarik sira infetadu ba moras dengue tama ospitál barak.
“Tanba preparasaun mak ladun másimu ne’ebé duvida iha komunidade sira kontinua iha. Nune’e ita presiza fó nafatin hanoin ba jestór sira tenke tuir treinamentu ida atu halo jestaun ba kazu dengue ho di’ak,” Vise Maucoli akresenta.
Ministériu Saúde mós agradese ba parseiru internasionál no nasionál liuliu Organizasaun Mundiál Saúde (OMS), Fundu Organizasaun Unida ba labarik sira (UNICEF), Cruz Vermella Timor-Leste (CVTL) ne’ebé apoiu ona aimoruk kímiku abate no fumigasaun hodi bele kombate kazu dengue iha Timor Leste.
Daudaun, Munisípiu Dili nafatin rejista kazu ne’ebe a’as iha primeira semana to’o sesta semana fulan fevereiru 2022, ho totál kazu 1.488 kazu. Nune’e haree ba kada loron kazu aumenta bebeik husi Munisípiu Dili.
To’o ohin loron hahú semana dahuluk fulan fevereiru tinan 2022, kazu dengue hosi postu administrativu Dom Alexo iha 808, Cristo-Rei 317, Vera-Cruz 154, no Nain Feto 169.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 290, Klínika Fatumeta 217, Sentru Saúde Comoro 454, Sentru Saúde Vera-Cruz 73, Sentru Saúde Formoza 204, Sentru Saúde Becora 189, Klínika Madre Eliza na’in-ida, Sentru Saúde Atauro 11, Sentru Saúde Metinaro 25, Klínika Bairru-Pité 22, Klínika Motael na’in-ida no Klínika Moris Foun na’in-ida.
Notísia relevante: Dengue hamate labarik na’in-31 no pasiente sa’e ba 2.339
Jornalista : Felicidade Ximenes
Editór : Florencio Miranda Ximenes
