DILI, 23 Abríl 2026 (TATOLI)– Polísia Nasionál Timor-Leste (PNTL) liuhusi Diresaun Servisu Investigasaun (DSIK), Kinta ne’e, ezekuta Tribunál Rekursu (TR) nia desizaun hodi halo detensaun ba kondenadu MSDC ne’ebé envolve krime omesídiu niglijente, xoke mate Zizelma Maria Verdial, iha área Delta II – Fomentu, iha Loja Funan Buras oin, iha loron 23 Marsu 2025.
Kazu ne’e rejista ho númeru prosesu NUC nuk 0285 25 TR Dili. Nune’e, ekipa DSIK hamutuk ho komunidade intelenjénsia ezekuta mandadu TR nian hodi lokaliza kedan kondenadu nia fatin hodi detein kondenadu iha Aldeia Ai-Lulik, Suku Letefoho, Munisípiu Manufahi.
Notísia relevante : Kazu Zizelma, TR deside aplika pena prizaun tinan-haat fulan-neen ba arguidu
Hafoin Autoridade Seguransa halo detensaun ba kondenadu MSDC iha nia fatin, DSIK lori kedan ba Komandu Jerál PNTL, Kaikoli hodi halo identifikasaun no sertifikasaun molok lori ba estabesimentu Prizionál Bekora hodi kumpre pena tinan-haat fulan-neen.
Rekorda fali katak iha loron Kuarta (01/04), TR liuhusi Juíz koletivu hasai akordaun ba kazu omesidiu niglijente ne’ebé envolve husi arguidu MSDC hodi rezulta Zizelma Maria Verdiál mate.
Nune’e, liuhusi akordaun ne’e, TR kondena kondenadu MSDC ho pena prizaun tanba faktus provadu kondenadu ninia envolvimentu iha kazu ne’e.
Jornalista : Natalino Costa
Editora : Julia Chatarina
