DILI, 30 marsu 2022 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, simu ona proposta hosi Dili Institute of Technology (DIT) atu loke tan kursu doutoramentu, maibé parte ministériu sei haruka uluk ekipa halo observasaun molok fó lisensa.
“Sira-nia dokumentu iha ona ha’u, agora ha’u hatún ona despaixu ba diresaun tékniku ensinu superiór atu halo uluk observasaun direita kona-ba planu DIT atu loke tan kursu doutoramentu, prienxe rekizitu ka lae,” Ministru Longuinhos hateten foin lalais ne’e, iha salaun UNITAL, Becora.
Notísia relevante: DIT hahú ona inzensaun propina semestre par ba estudante 3.775
Tuir Ministru, bainhira halo observasaun mak hatudu kursu doutoramentu ne’e iha duni preparasaun di’ak, ministériu bele fó lisensa ba DIT.
Iha biban hanesan, Reitór DIT, Alvaro Menezes, hateten, kursu doutoramentu ne’ebé atu loke foka liu ba área jestaun.
“Rekursu umanu ne’ebé atu reforsa kursu doutoramentu ne’e hamutuk na’in-14 rezidénsia iha Timór, ho nune’e bele konsidera programa ne’e forte tebes. Ami laiha problema ho rekursu umanu, tanba ami halo kooperasaun ho universidade internasionál sira hanesan iha Austrália, España, Indonézia no nasaun balun tan,” nia tenik.
Durasaun kursu ba doutoramentu ne’e tinan-haat, maibé la taka dalan karik estudante sira hakarak aselera lalais kursu ne’e iha tinan tolu nia-laran.
Jornalista : Tomé Amado
Editora : Julia Chatarina
