VIQUEQUE, 06 abril 2022 (TATOLI)--Xefe suku Uaibobo, postu administrativu Ossu, munisípiu Viqueque, Gollarte Melo Guterres, informa, maski Governu liuhosi Ministériu Adiministasaun Estatál (MAE) apoiu ona ekipamentu eletróniku ba suku maibé to’o agora sede suku Uaibobo seidauk asesu ba liña eletrisidade.
“Maski simu ona ekipamentu komputadór no imprime ba suku Uaibobo, maibé seidauk bele fó atendimentu ba komunidade tanba laiha eletrisidade hodi ekipamentu sira halo operasaun. Bainhira ita uza jeradór, ita sei hasa’e kustu boot, ami hein de’it bainhira maka eletrisidade tama iha ami-nia suku maka foin bele utiliza ekipamentu sira ne’e,” Líder komunitáriu hateten ba Agência TATOLI, iha salaun administrasaun Viqueque, kuarta ne’e.
Notísia relevante: MAE distribui komputadór no mákina imprime ba suku 36 iha Viqueque
Nia dehan, ekipamentu ne’ebé simu bele fasilita autoridade sira-nia serbisu hodi ajuda komunidade trata dokumentu, kompara ho tempu uluk laiha fasilidade difikulta autoridade sira halo atendimentu ba komunidade.
“Iha ha’u-nia mandatu, xefe suku foin dahuluk simu ekipamentu informátika hosi Governu. Liuhosi ekipamentu ne’e ami bele fó atendimentu ba komunidade ne’ebé trata sira-nia dokumentu ruma,” nia akresenta.
Antes ne’e, MAE distribui ona ekipamentu informátiku kompostu hosi komputadór ida, mákina imprimi ida no UPS prolink ida, ba suku hamutuk 36 iha munisípiu Viqueque hodi fasilita servisu administrasaun suku.
Jornalista : Vitorino Lopes da Costa
Editora : Julia Chatarina
