DILI, 01 jullu 2022 (TATOLI)—Ministériu Ensinu Superior Siénsia no Kultura (MESSK) hamutuk ho entidade relevante, sesta ne’e lansa programa estájiu profisionál ba graduadu naun bolseiru ho valór di’ak.
Nune’e, instituisaun públiku 12 no privadu ida prontu simu estudante 445 atu hala’o programa estájiu profisionál tuir méritu akadémiku.
“Ita hamosu programa estájiu profisionál ba estudante nasionál tuir méritu akadémiku ne’e atu fó empregu ba estudante graduadu mellor sira, nune’e bele hasa’e sira-nia koñesimentu no abilidade iha instituisaun públiku no privadu sira hodi prepara sira ba futuru,” Ministru Ensinu Superior Siénsia no Kultura, Longuinhos dos Santos, hateten iha serimónia lansamentu programa iha salaun Delta Nova, Comoro.
Notísia relevante: MESSK prepara lejizlasaun atu apoiu atividade estájiu profisionál non bolseiru
Instituisaun 13 ne’ebé prontu atu simu programa estájiu profisionál ne’e maka Ministériu Edukasaun Juventude no Desportu (MEJD), Universidade Nasionál Timor-Lorosa’e (UNTL), MESSK, Fundu Dezenvolvimentu Kapitál Umanu (FDCH, sigla portugés), Servisu Autónomu Medikamentu no Ekipamentu Saúde (SAMES), Provedoria Direitu Umanu no Justisa (PDHJ, sigla portugés), Ministériu Justisa (MJ), Eletrisidade de Timor-Leste (EDTL) Ministériu Interiór (MI) Parlamentu Nasionál (PN), Administrasaun Aeroportu no Navegasaun Aérea Timor-Leste (ANATL) no Timor Post.
Tuir Ministru, programa ne’e bazeia ba polítika VIII Governu Konstitusionál no programa ne’e rasik konsidera foun tanba foin mak realiza dahuluk, ho intensaun atu fó prioridade ba timor-oan sira ne’ebé maka ramata ona sira-nia estudu maibé ho klasifikasaun di’ak.
Programa estájiu profisionál ne’e loke ba estudante 445 ho área 58 no programa ne’e hetan mós orsamentu hosi ministériu rasik ho montante $437.500 atu realiza ba fulan-neen.
Enkuantu hosi area espesífiku 58 ne’ebé instituisaun públiku no privadu sira husu maka hanesan kontabilidade, IT, Edukasaun, Jestaun, Enjeñaria Sivíl, Administrasaun Públika, Direitu, Jestaun Finanseira, Matemátika, Kímika no lian portugés.
Iha fatin hanesan, Koordenadór Gabinete Koordenasaun ba Ezekusaun Programa Projetu no Jestaun ba informasaun hosi FDCH, Henrique do Rosário, esplika, benefísiu programa ne’e ba estajiáriu sira mak hanesan iha esperiénsia serbisu relasiona ho sira-nia estudu no htan mós matenek iha prátika inklui iha oportunidade atu esplora dalan ba karreira profisionál.
“Nune’e mós, iha valór esperiénsia serbisu hodi aumenta kurríkulu vitae (CV), hasa’e auto-estima, no hetan referénsia serbisu hosi funsionáriu permanente iha instituisaun sira,” nia tenik.
Jornalista : Tomé Amado
Editora : Julia Chatarina
