OÉ-CUSSE, 08 jullu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, akompaña hosi Sekretária Rejionál Asuntu Edukasaun no Solidariédade Sosiál, Abelina da Costa, iha kuarta ne’e, relata progresu serbisu setór edukasaun ba Ministru Edukasaun Juventude no Desportu (MEJD), Armindo Maia.
“Iha kuarta semana ne’e ita ba nasionál halo enkontru koordenasaun ida ho Ministru Edukasaun, atu relata ita-nia progresu serbisu no atividade tomak kona-bá edukasaun nian, tanba RAEOA rejiaun ida persiza hato’o progresu no difikuldade sira-ne’ebé mak rejiaun enfrenta ba Governu Sentrál,” Arsénio Paixão ko’alia iha Oé-Cusse, sesta ne’e.
Nia informa, sorumutu ne’e importante tebes atu informa kona-bá pontu situasaun edukasaun rejiaun nian, tanba durante ne’e RAEOA koOpera ho Institutu Nasionál Formasaun ba Dosente no Profisionál Edukasaun (INFORDEPE) hamutuk ho Univesidade Nasionál Timor Lorosa’e (UNTL) fasilita kursu formasaun baxarelatu ba profesór na’in-185.
Atividade ne’e agora besik finaliza ona iha tinan ne’e, tanba sei halo graduasaun iha tempu badak, tán ne’e maka presiza informa ba Governu Sentrál tanba daudaun ne’e rejiaun mós halo ona rejistu foun ba formandu sira hamutuk na’in-116 ba programa baxarelatu.
Ezekutivu ne’e fundamenta, iha sorumutu ne’e mós, informa kona-bá formasaun ba iha programa Informasaun Komunikasaun Teknolojia (ITC) ne’ebé implementa ona iha nivél Ensinu Báziku no Eskola Sekundáriu Jerál sira iha sub-rejiaun Pante Makasar, Oésilo Pássabe no Nítibe.
Nune’e mós informa kona-bá programa Oé-Cusse Bussiness Incubatór (OBI) at School hosi UNDP iha Ensinu Báziku Sentrál (EBC, sigla portugés) hamutuk 12 kona-bá jestaun finanseiru no hanorin profesór no alunu sira atu uza produtu lokál no sasán sira ne’ebé la uza ona hodi halo resiklajen atu fa’an no hetan lukru.
Alende ne’e, informa mós kona-bá Programa Bahasa Indonézia Penutur Asin (BIPA), programa edukasaun multi lian (EMULI), tanba ne’e hanesan pilotu ida sei kontinua eziste, nomoos informa kona-bá profesór ho idade avansadu sira iha diretu atu reforma no presiza karta pedidu reforma.
“Planu prioridade ba tinan ne’e iha konstrusaun ba fasilidade edukasaun nian ita sei konstrui sentru formasaun ba profesór-sira inklui sala ICT no inklui sala prátika siénsia, konstrusaun foun ba dormitóriu Ambeno iha Díli Komoro, jardin infantil neen (6) reabilitasaun neen (6) konstrusaun edifisiu tolu,” nia katak.
Iha 2021 autoridade liuhosi Sekretária Edukasaun konsege konstrui ona eskola unidade 14 iha territóriu Oé-Cusse, no iha planu atu estabelese pré-eskolár ba suku hotu tuir etapa.
Nune’e mós iha hanoin mós ba futuru sei iha rekrutamentu ba profesór pré-eskolár ba iha ensinu bázika sira ho sekundáriu tuir nível bazea ba área espesialidade.
Totál eskola Ensinu Sekundáriu Jerál iha RAEOA hamutuk hitu (7), Tékniku Vokasionál tolu (3) Ensinu Básiku 74, no ensinu pr’e-eskolár hamutuk (16) nune’e totál eskola iha RAEOA hamutuk 123 no totál númeru estudante ne’ebé alistadu 51.246.
Jornalista : Abílio Elo Nini
Editór : Evaristo Soares Martins
