DILI, 11 jullu 2022 (TATOLI)—Partidu Demokrátiku (PD) liu hosi konferénsia nasionál ne’ebé realiza iha domingu (10 jullu 2022) ne’e hasai pontu lima no prolonga mandatu estrutura órgaun partidu nian.
Notísia Relevante: PD realiza konferénsia nasionál dahaat hodi hasoru eleisaun parlamentár
Kounikadu ne’ebé Agência Tatoli asesu, segunda ne’e, haktuir tuir estatutu Partidu Demokrátiku (PD) artigu 156° alinea (1) hateten, konferénsia nasionál mak forum hodi formula desizaun polítika foun ne’ebé la inklui iha desizaun polítika kongresu tama iha mudansa konjuntura polítika ne’ebé la prevee iha kongresu.
Konsidera diskusaun kle’an kona-ba lejitimidade estrutura Partidu Demokrátiku ne’ebé mandatu remata iha loron 26 fevereiru 2022 no ho razaun polítika iha nesesidade atu reafirma ezisténsia estrutura órgaun partidu nian.
Konferénsia nasionál Partidu Demokrátiku, iha loron 10 fulan-jullu 2022 ne’e, ho
partisipasaun konferensista hamutuk na’in-365 konforme hatur iha artigu 156° alinea (2), aprova pontu lima.
Pontu dahuluk, reafirma prolongamentu mandatu estrutura órgaun Partidu Demokrátiku iha nivél hotu-hotu.
Daruak, katak depois eleisaun parlamentár 2023, sei realiza kongresu nasionál haktuir estatutu Partidu Demokrátiku artigu 35° alinea (2).
Datoluk, iha fulan ida-nia laran hahú hosi rezolusaun ne’e fó sai, Konsellu Superiór
Partidu (CSP-PD) ho kumprimentu artigu 38° alinea (h) tenke halo substituisaun kuadru inativu no prensimentu estrutura ne’ebé mamuk hodi asegura funsionamentu regular estrutura órgaun partidu nian.
Dahaat, pontu tolu hosi rezolusaun ne’e, aplika mós ba estrutura iha nível sub-nasionál.
Dalimak, rezolusaun konferénsia nasionál ida-ne’e hahú vigora iha loron asinatura.
Notísia Relevante: Assanami: “Partidu kiik ka boot la importante, importante mak serbí Estadu”
Jornalista : Nelson de Sousa
Editór : Cancio Ximenes
