DILI, 15 jullu 2022 (TATOLI)—Prezidente Konsellu Veteranu Munisípiu Ermera, António Soares ‘Tatamailau’, informa iha tinan 2022 ne’e ekipa verifikadór hosi nasionál sei halo reverifikasaun ba dadus veteranu pendente 2003-2005 nian iha munisípiu Ermera hamutuk 2000-resin.
“Ami mós iha ona planu atu halo reverifikasaun ba dadus veteranu ne’ebé mak pendente iha 2003 no 2005 nian hamutuk rihun rua-resin,” nia dehan ba Agência TATOLI, iha CCLN, Comoro, DiLi.
Tuir nia, atu halo reverifikasaun ne’e sei akontese bainhira ekipa verifikasaun ba dadus veteran rejistadu tinan 2009 nian ne’e finaliza ka konklui hotu ona mak mak bele hahú fali halo reverifikasaun ba dadus veteran 2003-2005 nian.
“Ita esforsu atu halo reverifikasaun ba dadus pendente sira atu nune’e ita bele hadi’a sira-nia istória. no sé mak atu hetan direitu ne’ebé tuir duni sira-nia sakrifisiu durante luta iha ai-laran,” nia dehan.
Hosi totál númeru pendente ne’e, nia dehan, balun la tuir grau servisu ne’ebé iha ai-laran no balun falsifika dokumentu, maibé atu hatene di’ak liután mak presiza halo reverifikasaun ba dadus no konfirma ho nia sasin katak ema ne’e involve no sai hanesan veteran loloos ka lae.
“Se la loos mak tenke esklui, nune’e Governu foka de’it ba ema-ne’ebé mak ho dokumentu loos,” nia dehan.
Benefisiáriu ba pensaun veteranu no martir hamutuk ema na’in-28.558, kompostu hosi Aileu 1.395, Ainaro 2.206, Baucau 4.136, Bobonaro 2.528, Covalima 1.424, Dili 2.119, Ermera 3.623, Lautém 2.420, Liquiçá 1.419, Manatuto 2.141, Manufahi 1.456, Oé- Cusse 404, Viqueque 3.256 no sidadaun timoroan ne’ebé hela iha diáspora hamutuk 28.
Pensaun ba antigu kombatente hatuur ona iha dekretu-lei númeru 3/2006 no alterasaun dahuluk dekretu-lei 9/2009, estatutu kombatente libertasaun nasionál hodi fó rekoñesimentu ba sidadaun hotu ne’ebé partisipa iha prosesu luta ba libertasaun nasionál.
Jornalista : Osória Marques
Editór : Cancio Ximenes
