BAUCAU, 20 jullu 2022 (TATOLI) – Konfederasaun Sindikatu Timor-Leste (KSTL) husu emprezáriu no traballadór thametin relasaun kooperasaun nune’e kompleta malu hodi redús kazu konfrontu hanesan violasaun direitu no devér.
Prezidente KSTL, Almerio Vila Nova, esplika, kazu konfrontu relasaun industriál ne’ebé durante ne’e mosu tanba empregadór no traballadór seidauk iha kooperasaun ba malu, laiha komunikasaun di’ak atu haree hamutuk kona-bá mekanismu tratamentu keixa ne’ebé mak mosu tanba parte rua ladún iha konfiansa, inisiativa di’ak ba malu atu fó solusaun ba disputa ne’ebé mosu iha sira-nia empreza rasik.
“Laiha ida mak hamriik mesak, traballadór iha tanba empregadór iha hanesan mós empregadór iha tanba traballadór iha, tanba ne’e parte rua presiza koopera hamutuk hodi hametin liután relasaun indutriál iha nível empreza hodi kontribui ba produtividade kompañia,” Prezidente KSTL hateten iha Vila Antiga, tersa ne’e.
Prezensa KSTL iha Baucau hamutuk ho Kámara Komérsiu Indústria Timor-Leste (CCITL, sigla portugés) hetan apoia hosi The International Labor Organizatuon (ILO) no hetan observasaun hosi Sekretaria Estadu Formasaun Profesionál (SEFOPE) realiza sensibilizasaun konjunta kona-ba mekanismu ka prosedimentu keixa ho objetivu bele redús konfrontu iha nível empreza nian.
Sensibilizasaun ne’e kona-ba lei númeru 4/2012, loron 21 febereiru kona-ba traballador nian ba empregadór no traballadór iha territóriu timor laran tanba maioria seidauk iha koñesimentu hanesan traballadór seidauk hatene ninia obrigasaun tuir lei no kontratu traballu.
KSTL no CCITL iha obrigasaun inportante atu kanaliza informasaun ba empregadór no traballadór tanba bainhira traballadór viola devér signifika viola empregadór nia direitu, nune’e mos empregadór viola deéer signifika viola traballadór nia dereitu.
“Parte rua presiza iha koñesimentu kle’an kona-bá sira-nia devér no direitu nune’e labele hetan violasaun ba sira-nia direitu rasik,” Almerio Vila Nova argumenta.
Durante ne’e KSTL rejista keixa hamutuk rihun hitu-resin, maioria keixa kona-ba hakotu relasaun traballu no saláriu mínimu, iha tinan- 2021 rejista kazu purvolta 200 no inísiu tinan 2022 rejista kazu 30-resin.
Jornalista : Natalino Belo
Editór : Evaristo Soares Martins